ХулҺнын Үкл — миисин зог.

↑

⇐ ПредыдущаяСтр 139 из 156Следующая ⇒

ХУЛҺНЫН ҮКЛ — МИИСИН ЗОГ.

Түрү-зүдү, зовлң үзсн күүһәр зог кеҗ, терүг наад бәрлһиг шалһҗ, терүг миист бәргдсн хулһнла дүңцүлҗәх чинртә үлгүр. Хулһныг мис бәрәд иддгинь кен болвчн меднә, бәрҗ авсн хулһнарн мис зог кеһәд, өмн хойр көл хоорндан тәвчкәд, кесгтән терүгәр наадҗ бәәһәд, ут сүүлднь уурнь күрәд, наад, зог кеҗәсн хулһнан мис җаҗлад, идәд орксна хөөннь, оч хулһнын үклнь миисин зог болҗ һардг кенд чигн медгднә.

ХУЛХАЧ НОХА ХУЦҖ ИРДГ, ХУДЛЧ КҮН ИНӘҖ ИРДГ.

Худлч күүнд дурго болсн учрар, энүнд тер шалһгдҗ, терүг хулхач нохала дүңцүлҗәнә. Эн үлгүриг келхләрн, хулхач нохан тускар болн худлч күүнә тускар, теднә дассн авъясин тускар келгдҗәнә. Хулхач ноха хуцҗ ирдгин учрнь: күүнә, эҗго герт орҗ, хулха кехән медүлш угаһар, зөрц хуцн йовҗ, герин үүдәрнь эс гиҗ термин нүкәрнь орҗ, хулха кенә; худлч күн инәһәд, худлчан күүнд медүлш угаһар, күүг таньсн-үзсн болад, зөрц инәҗ ирнә.

ХУЛХАЧ ХӘРҮ ХӘӘКРДГ.

Хулха кечкәд, терүндән хулха эс кесинь медә бәәҗ, талдан кү хар гөрәр бәрҗ өгсн цагт, эн үлгүр олзлгдна. Хулхач күн әвр мектә болдг төләдән, хулха кечкәд, хәрү эргәд, хулхалҗ авсн эзн тал зөрц ирәд, эс авсн күүг хулха келә гиҗ бәрҗ өгнә. Эн товчта үгиг келхләрн, хойр күн хоорндан цүүглдхләрн, негнь негән му келчкәд, му эс келсн күн тал хәләҗ бәәһәд, «би чамаг му келсн угав, хәрнь чи намаг му келвч» гихлә, тер күүнә тускар эн товчта үгиг зааҗ, «хулхач хәрү хәәкрнә» гиҗ келгднә.

ХУН КЕДҮ ДОГШН БОЛВЧН, ӨНДГӘН ХАМХЛДГО.

Эк-эцк ямаран догшн болвчн, ямаран кевәр уурлвчн, үрән (күүкн, көвүһән) алшго гисн чинртә үлгүр. Олн зүсн шовуд заагт догшн чигн, номһн чигн шовун бәәнә. Догшн шовудын тоод хун шовун орна, болв хун кедү догшн болвчн, өндгән хамхлдго гиҗ келгднә.

ХУР ОРХЛА — ҺАЗР НОРДГ, ХУУРМГ БОЛХЛА — НЕРН БУУРДГ.

Хур орсн цагт, һазр норл уга бәәшго, тедү мет көдлмшиг хуурмгар, мууһар, дуту-дундар кехлә, терүнә нерн эркән уга буурх йоста, терүг хур орхд норсн һазрла дүңцүлҗ, тедү мет нер бузрдхиг медүлҗ, энүнд сурһмҗ өггдҗәнә. Юңгад гихлә, орсн хур һазрт шиңгрәд, һазриг норһадг, хуурмгар көдлмш кесн күн болвас нерән эркн биш бузрдадг эс гиҗ му нер авдг төләд, эн үлгүрт орҗ келгднә.

Познавательные статьи:



Алгоритмические операторы Matlab

Конструирование и порядок расчёта дорожной одежды

Исследования учёных: почему помогают молитвы?

Почему терпят неудачу многие предприниматели?