Баатр — баатр биш, саг — баатр.

↑

⇐ ПредыдущаяСтр 18 из 156Следующая ⇒

Б

БААТР — БААТР БИШ, САГ — БААТР.

Күн ямаран зөргтә, баатр болвчн, саг-сергг эс болхла, терүнә зөрг, чидл, терүнә баатр йовдл юмнд тусан күргшго гисн чинртә үгмүд. Баатр болн зөргтә күүг чидл уга мектә өшәтн диилҗ чадхмн гисн сурһмҗ эн үгмүдт келгдҗәнә. Баатр, чиирг, зөргтә болн саг-сергг болх зөвтә гисн сүв-селвг энүнд өггдҗәнә.

БААТР НЕГ ҮКТЛ, ӘӘМТХӘ КҮН МИҢҺ ҮКДГ.

Күн зөргтә болтха, әәшго юмнас бичә әәтхә гисн, сурһмҗта үгмүд. Зөргтә күн болн зөрг уга, әәмтхә күн хойран тускар, дүңцүлгдҗ, эн үлгүрт келгдҗәнә. Зөрг уга, әәмтхә күн урдаснь юмнас сүрдәд, әәһә бәәҗ, зүркнь хаһрад, әмнь һарад, үкхәсн түрүләд үкҗ оддг чигн йовдл харһна. Үлгүринь келхд, дәәнә цагт зөргтә күн сумнас сүрдҗ әәл уга, эв-арһан олзлад, шудтан, өмәрән зөрәд йовад йовхла, зөрг уга әәмтхә күн, сумн тусч одх гиһәд, иигән-тиигән сумнас дальтрнав гиһәд, зулхлань, әәмтхә күүнд сумн тусад, тер күн үкҗ чигн оддг саам бәәнә.

Зөргтә күүг нохан бийнь чигн дәврҗ зуухш, зөрг уга әәмтхә күн болхла, терүг әәҗәхинь зууһач ноха медчкәд, дәврәд зуучкна. Дән болҗ бәәсн цагла хортнла дәәлдҗ йовад, әәмтхә күн әәһәд, һарад зулхлань, хортн терүг әәмтхәһинь медчкәд, ардаснь көөһәд эс гиҗ хаһад, эс гиҗ җидәр шааһад, эс гиҗ чашкар чавчад, алчкна. Баатр күн юмнас сүрдҗ үүмәцхш, тегәд тер зер-зевән, бууһан төвәр бәрҗ хана, бийән алх хортыг тер диилнә. Әәмтхә күн әәһә, үүмәцә бәәҗ, эврәннь зер-зевән батар бәрҗ чадхш, бәәсн бийнь чичрәд, сүрдәд, ухаһан алдад, кесг әәмшглә харһна, тегәд чигн әәмтхә күн миңһ үкх гиҗ келгднә, тедү мет олн әәмшглә тер харһна.

Тегәд чигн кезәнә цагас нааран эн үлгүриг хальмг олн әмтн келхләрн, зөргтә әәмтхә хойр кү дүңцүлҗ, үлгүрт орулҗ, келдг болсмн.

БАЙМБ ГИҖ БИЧӘ ДЕЕРЛК, УГАТЯВ ГИҖ БИЧӘ УЙД.

Әмтн цуһар әдл зөвтә, байн күн болвчн, угатя күн болвчн нег зөвтә, әдл улс гисн сурһмҗта үгмүд. Байн күн сән биш, угатя күн му биш, тедн әдл улс гисн үгмүд. Зуг һанцхн байн күүнә эс гиҗ угатя күүнә тускар эн үлгүрт келгдҗ бәәхмн уга. Ик зөөртәв, хавтхдан дала болсн мөңгтәв гиһәд, әмтнд деерлкәд йовдг күн медҗ болх уга нег зеткрин үүләр ик аюлла (түүмрлә эс гиҗ тонулла) харһад, тиигҗ әмтнд деерлкҗ йовсн күн зөөрәсн эс гиҗ мөңгнәсн хольҗад чигн оддг саам харһдмн.

Угатяв, нанд мел юмн уга, хоосн домбр-доск күмб гиһәд, урдаснь хөвәсн цөкрәд, урудад йовх кергго гисн сурһмҗ энүнд өггдҗәнә. Күн, медҗ болх уга, сәәнәр седклән тәвәд, көдлмш кеһәд, орн-нутгт тус күргәд, олнд тоомсрта күн болад чигн оддг саам бәәнә. Ода деерән ик түрү-зүдү бәәнәв, арһм тасрхдан өөрдҗ йовнав гиҗ, кен чигн күүнә урдаснь хөвәсн цөкрҗ, му санҗ, урудх кергго.

Тегәд чигн эн олн әмтнә цецн уханас һарсн «баймб гиҗ бичә деерлк, угатяв гиҗ бичә уйд, бичә зов» гидг үлгүр кен чигн бәәдл-җирһллә ниицәтә үлгүр.

Познавательные статьи:



Формы дистанционного обучения

Передача мяча двумя руками снизу

Значение правильной осанки для жизнедеятельности человека

Основные ошибки при выполнении передач мяча на месте