Sevälef vpakluba zenodik plo Striän in Graz.

↑

⇐ ПредыдущаяСтр 13 из 13

Sevälef vpakluba zenodik plo Striän in Graz.

Pepüböl fa Volapükaklub zänik pro Stirän. — Nivera-büköp lampörik: ‘Styria’ in ‘Graz’.

Pübel: „Volapükaklub zenodik plo Stirän.“ — Nivera-büköp limepik ‚Styria‘ in Graz.

LOVEGIV REDAKAMA.

Lovegiv redakama.

Söl ledinitik: monsinyor: ‘Y. M. Schleyer’ lovegivom redakami
ela “Vpabled lezenodik“ söle ledinitik: ‘Karl Zetter’ (‘Graz’)
in ‘Konstanz’ tü 1896, VII^ul, 30.

(Dat magod no padämükonöd dub koboplifam bleda e dub bükaped su pad telid, magod it no pepladon ini zänod e dil pödaflanik tefik bleda no pebebükon.)

Lovegivam redakama.

Söl led. msl. Schleyer Y. M. lovegivom redakami ela „Vpabled lezenodik“ söle led. Zetter Karl (Graz) in Konstanz 1896, VII^ul 30^id.

(Dat mag no padämomöd dubü koplifam bleda e dubü bükapedam su flan telid, mag it no pepladom in zenodi e geflan no pebebükom.)

Program e levüd.

Glidi vemikün! Menefe bal, püki bal!

Ai fiedobsös kol sit datuvala!

Plogam e vüdam.

Glidüno! Menade bal — püki bal! Aifiedü sit datuvala!

Me spiked at redak ela “Vpabled lezenodik e calabled vpa” [= “Volapükabled cifik ä calabled Volapükamufa”] jonodon oki Volapükanavole. Söl ledinitik: datikan Volapüka < enotükom ya in nüm 191^id calableda oka, das, ad säfledön boso oki it, pamütom-la ad lovegivön redakami calableda oka lanälane votik kodü bäld e fibikam progedöl logamafäga okik, i vätälölo dinädi ut, das desirom ad ledunön vobodis nog lemödikis dü ret lifüpa oke pelegivöla. Id enotükom, das ecälodom fovani ä cifali fütürikis as redakan fütürik, keli ecalükom asä fovani ya tü 1894, VII^ul, 1. Redakan edispenöl senälom in dibät ladäla oka bligi saludik ad notükön notidiko dani vemikün ledivodik oka söle ledinitik: datuval < demü blöf at konfida lölöfik. No kanoy cedön atosi asä dini pülik, if fat seimik eklülädom pamütön ad lükonfidön cili mu pelöföli oka names foginik. I pö jenet obas logobs kudi fata lovegivöl cili oka: löfäb tikäla ä steifa oka < names votik. Lovegiv at binon balflano blöf klülabiko mu lestimöl konfida fatana kol man, kele lovegivom jafoti (ü cili), e votaflano stigädam dranikün pro lovesumölan ad jonön oki me nämäls valik asä digädiki sika pegetöl dub konfid fatana. Redakan attimik calableda suemom lölöfiküno dinädis bofik at. Utos, das söl ledinitik: datuval < ecälodom ebo omi, vo ejenon — nedemölo dinädis votik — lepato sekü kod at, das söl ledinitik: datuval < nolom legudiko, das redakan pecälodöl kanom lekonfidön fasilo yufi büköpa me bükaneodots zesüdik peblimöla, bi vobom ya dü yels 28 in büköp at as redakan gaseda bolitik, sodas püb calableda okodon ome fikulotis nemödikum, ka redakane seimik votik.

Me devied at redakef ela „Vpabled lezenodik e calabled vpa“ bitopom oki vpavole. Söl led. datuval vpa enotom ya in nüm 191^id calableda oka, das, al leitön boso oki it, pamütom-la lovegivön redakami calableda oka nämäle votik kodü bäledüp e fibug gloföl logas okik e konsidü dinäd, das levipom lefulön vobädis nog lemödik du lemän lifüpa, pelegivöl ome. Enotom i, das edavälom osukali as oredakeli, keli edanemom aso sukali ya 1894, VII^ul 1^id. Redakel pedisopenöl senom in dib lada oka bligi sanik sepükön maniföfo danüni divodikün oka söle led. datuval plo blöf at konfida lefulik. No kanon cedön atosi as dini pülöfik, if fat sembal logom oki pemütöl(i) lekonfidön cili pelöfölün oka names foginik. Id in zit obas logobs kudi fata, lovegivöl cili oka, löfäbi siäma ä steifama oka, names votik. Lovegivam at binom baflano zelädüno blöf lestimölün konfida fata kol man, kele lovegivom cili, e voflano stigam nämälikün plo lovesumölan, al blöfön oki me nämäls valik aso digik(i) pesiköna dubü konfid fata. Redakel anuik calableda kapälom lefuliküno jenis bofik at. Das söl led. datuval edavälom ebo omi, ejenos vo — nekonsidü dinäds votik — lepato se kod at, bi söl led. datuval nolom legudiko, das redakel pedavälöl kanom büadön nefikulo tefü büköp, peblimöl me bükameds bizugik, bi vobom ya sis yels 28 in büköp at aso redakel gaseda bolitik, sodas pübam calableda okodom ome fikulis nemödikum ka redakele sembal votik.

To dinäds gönik at lemödikos nog binon levipabik. Bu valikos: fied lebonedanas. Redakan sekü kod at begom lebonedanes valik jünuik, das blebonsös fiedik kol calabled i pötü püb nulik; begom draniküno lebonedanes fiedik at, das blöfonsös fiedi e divodi okas kol calabled dub slopükam lebonedanas votik nulik ad pakön gudiküno dini legretik obas. Ni küped, ni spet neduniks oyufons dini obas, ab dunod nenfenik “me näms pebalöl”. Din obas vo binon magifik ä nobik; digädon utosi, das mens nobälik valik kevobonsöd ad pakön oni, e das vobonsöd me näms pebalöl! Baläl jafon nämädi!

Nestü dinäds gönik at lemödikos mutos nog palevipön. Bü valikos fied bonedelas. Redakel bekom sikodo valikis bonedelis jünuik, das blibomsös fiedik calablede i pötü pübam nulik; bekom ledlanölüno bonedelis fiedik at, das blöfomsös fiedi e slopäli okas kol calabled dubü süakam votikas bonedelas nulik, al pakön gudiküno dini legletik obas. No lülogön u valädön neduniko oyufos dini obas, sod dunöf nefenik „me näms pebalöl“. Din obas binom vo gletobidik ä nobälik; digom, das valiks mens nobälik kevobomsöd al pakön omi, e das vobomsöd me näms pebalöl! Balad mekom stenüdi!

Telido, redakan begom ladöfiküno, das Volapükans lestimik yufonsös omi pö vobod me yegeds brefik u lunikumis, me penets, e r.… dö Vp, dö pak Vpa in läns tefik, dö jenükotsin Vpaklubs, brefo: dö valikos Volapükanavoli nitedöl. Ninäd gaseda omuton binön distöfik e nitedik. If num lebonedanas umödikumon, i gased it okanon pagretükumön, sodas spad okanon pagebidükön i yegedes gretikum, lekonedes pafövöl, e r.… Klülo id in dinäd at kevob kobädik Volapükanas valik ozesüdon, efe Volapükanas nämäli e noli ad vob literatavik dalabölas. Lepato Volapükaklubes valik pabegos draniküno ad nunodön mögiküno suno dö jenots pö klubafebäd okas. Redak ai obenokömaglidon ed ai onotükon fredaladäliküno keblünotis literatik somik.

Telido redakel bekom ladliküno, das vpans lestimik yüfomsös omi in vobäd me laltügs blefik u lonedikum, me noteds e l… dö vp, dö pakam vpa in läns tefik, dö zitsin vpaklubs, blefo dö valikos nitedöl vpavoli. Ninöf bleda omutom binön mänifodik e nitedik. If möd bonedelas uglofom, i bled it okanom pagletön, sodas spad kanom pamekön i plo laltügs gletikum, plo koneds pafovöl e l… Kluo id in dinäd at kevobam pebalöl vpanas valik ozesüdom, efe vpanas, labedöl nämäli e noli al vobön literatiko. Lepato vpaklubs valik pabekoms dlanölüno, nunodön, sunüno dö zits in klubadunöf okas. Redakef oibeglidom ed oimaniföfom gälüno literatikis läpolotis somik.

Bi dabükot 5^id vödabuka söla ledinitik: datuval < no nog pefimekon e no nog epubon in lepüks netik, ozesüdos büfo, dat nesuemov pavitonös, das dil necalöfik ela “Volapükabled” polauton ma dabükot 4^id vödabuka pö nams Volapükanas mödikün jünu dabinöl. Votükams e nulükams (vöds nulik) ponüpladons e pomiedetons pianiko. Redak kodü atos begon Volapükanes lestimik nüsedotis literatik desinöles, das binonsös flenöfiks ad lautön yegedis ön mod penunöl.

Bi segivot 5^id vödasbuka söla led. datuval no nog pefinom e no nog epubom in glepüks netik, ozesüdos büo, al vitön nekapälnöfi, das dil necalik vpableda polautom segun segivot 4^id vödasbuka, sibinöl jünu in nams vpanas lemödikün. Votams e nulams (vöds nulik) ponindukoms e poseplänoms pianiko. Redakef bekom sikodo vpanis lestimik, desänöl ninsedamis literatik, das lautomsös plidiküno laltügis in mod pesagöl.

El “Volapükabled lezenodik” osteifon te pakön Vpi datuvala, ma kelos bespiks sitas votik, penäds dö feits tefü menods e r.… no okanons palasumön. Vob süenik ä püd ai mutons blebön lebligäd steifas obsik.

Vpabled lezenodik osteifom te pakön vpi datuvala, kodo bepükams sitas votik, penots dö feits tefü menodams e l… no okanoms palasumön. Vob süenik e püd aimutoms blibön glesugivot steifas obsik.

Bi fräds pro püb ela „Volapükabled lezenodik” ma fom nulik papüböla emutons pagretükumön boso ad dagetön i söle: datuval < stimapeli (stimamesedi), ifi no pötöli lölöfiko demü datuvot magifik e dunod nämis koapik oma fegeböl, ed ad prodön keblünoti kosidik pro kosidamed oma, redak dälon oke ad notükön stipotis leboneda fomü lonots sököl:

suäm a yel lölik pro Lösterän-Macarän flons 2.—

     „   „   „ Deutän                 maks 3.50

     „   „   „ läns foginik retik frans 5.—

keninükamü potamon.

Bi delids plo pübam vpableda lezenodik, papüböl in fom nulik, emutoms pagletön boso, al lukiblinön i söle datuval stimabi (stimasoledi), ifi no pötöli lefulo datuvote gletobidik e dunöfe kösumöl nämis koapik oma, ed al duinön läpoloti ledebik plo lifakosit oma redakef dälom oke pesevamön stipamis bonedama in lonots suköl:

suäm lölyelsik plo Löstän-Nugän  flons 2.—

     „   „   „   Deutän         maks 3.50

     „   „   „   selän lemänik frans 5.—

ninkikü potamon.

Dat fräd pro potamon poläsükon, bi getotadil mögiko gretik söton jonidön ad disein löpo pemäniotöl, obinos vipabik, das Volapükans in zif ot liföls balonsös okis ad grup zü liman seimik samädis pro limans valik usik medü potapäked bal sivöl ad seagivön sedotis bevü lebonedans in zif et.

Al lunön delidis plo potamon, bi pluninsumam sötom pakösekön diseine penömodöl löpo, obinos viplik, das vpans zifa öt balomsös okis tefü kopanal sembal, sivöl samädis plo valiks kopanals usik dubü potapäked bal, al sedilön omis bevü bonedels in zif et.

El “Volapükabled lezenodik” opubon almuliko ün vig balid. Redak begon flenöfiküno e draniküno, das bonedasuäm ponüsedonös mögiküno suno ad vitön neletiani pö desed.

Vpabled lezenodik opubom vämulo in vig balid. Redakef bekom plütiküno e dlanölüno, das bonedasuäm poninsedomös lesuno, al vitön tupami in sedam.

Glidi vemikün! Bitobsös ko yuf Goda me nämäls pebalöl! Volapük lifonös! Datuvan Volapüka lifomös!

Glidünö! Ko yüf Goda me nämäls pebalöl! Lifö vp! Lifö datuval vpa!

    Ladet: Redak ela „Vpabled lezenodik”        Pro redak ela “Vpabled lezenodik”

                                 ladetü                  ‘Zetter Karl’ m. p. <?>:

                     prof.: ‘Zetter Karl’,        profäsoran lampör-regіk, kardinalacäman,

    ‚Graz’, Lösterän, ‚Annenstraße’ 12, II.,      senätan Vpa ä redakan ela “Vpabled

                    ‘Steiermark’ (Stirän).                            lezenodik”.

       Ladet: Redakef vpableda lezenodik   Plo redakef vpableda lezenodik

                                 ladetü                                    Zetter Karl m. p.,

                       plof. Zetter Karl,      plofed l. r., konsälal konsistorik,

        Graz, Löstän, Annenstraße 12, II.,    senätan vpa ä redakel vpableda

                             Steiermark.                                              lezenodik.

* * *

* * *

Söl ledinitik: datuval < epenom redakane sökölosi:

Söl led. datuval epenom redakele sukölosi:

“Söle ledinitik: ‘Zetter Karl’ in ‘Graz’.

„Söle led. Zetter Karl in Graz.

Zepob löliko programi ola; ibä lesagon lölöfiko dinis ebo otis, dö kels ebalädikobs mudöfo ä penädo ün gustul in ‘Konstanz’. Komandob draniküno Volapükanes valik su tal lölik ad dasumön leladöfo programi at. Volapük, kel evikodon ya teoriko, muton nu papakön plagiko, ed ovikodon nendoto, if Volapükans fiedik valik okevobons fümäliko in baiod ko ob e ko ol! God ai benedonös vobodis ola e flenis ä kevobanis olikis!

Zepob löliko plogami ola; ibo sagom lefulo ötosi, kelosi ebalamobs mudo ä penädo in jölul in Konstanz. Komedob dlanölüno vpanes valik su tal lölik, beladön plogami at. Vp evikodom ya teoriko, mutom nu papakön plagiko, ed ovikodom zelädo, if valiks vpans fiedik okevoboms fümiko in balif ke obs e ke ol! God ailäbädomös vobis ola e flenis ä kevobelis olik!

Volapük lifonös! Lifonsös Volapükans fiedik valik!

‘Konstanz’, 1896, X^ul, 25.

Lifö vp! Lifomsös valiks vpans fiedik!

Konstanz, 1896, X^ul 25^id.

                                   monsinyor: ‘Schleyer Yoh. Martin’ m. p.,

                                   klänakameran papik, pädan plödü dün, datikan Vpa.”

                                                   msl. Schleyer Yoh. Martin m. p.,

                                                   kamsekral papik, pädal p. d., datikel vpa.“

El “Vpabled lezenodik”. 1897. Nüm: 193 (yanul). Pads: 811, 812.

Poed in e pro Volapük.

Fa ‘Kausch O.’, ‘Dresden’.

Poed in e plo volapük.

Fa Kausch O., Dresden.

Poed eyufon valatopo kulivi püka e paki literata. Bu valikos kanits evobedons vemo atosi. Sevobs ya kanitis klerik se tim paostolanas. Kanits at änämöfükons ai ladäli e lani menas. Fovo kanits volädik (neklerik) dünons kulivi menefa, a. s. kanits lefäkälik lelöfa e flenama, pöpalids (lomäna-) e kanits febädanas e kriga… Pak poedik Volapükik lepato fruton Volapüki. Sekü kod at tuvobs vobotis mödik poedik in valemapük obas. Datuval it ejafädom liänis susnumik. Vobots poedanas ömik petradutons löliko u dilo: a. s. vobots elas ‘Schiller’, ‘Petöfy’, ‘Carlyle’, ‘Carducci’, ‘Runeberg’, ‘Smeetham’, ‘Tennyson’, ‘Addison’, ‘Loveling’, ‘Nekrasov’, ‘Saphir’, ‘Heine’, ‘Bodenstedt’, ‘Chamisso’ (kanits lätikanas ponotükons suno).

Poed eyüfom vätopo kulivi püka e pakami literata. Bizugiko kanits evobädoms en vemo. Sevobs ya kanitis klerik se tim postelas. Kanits at eklietoms egelo ladi e lani menas. Täno kanits volik (neklerik) dünoms plo kuliv menefa a. s. kanits liedodik löfa e flenüga, kanits popik (fataläna-) e kanits namuna e kliga… Pakam poedik vpk. pöfüdom lepatiko volapüke. Sikod tuvobs vobädis mödik poedikis inü väpük obsa. Datuval emekom it liänis nenumik. Vobäds poedanas teldik pelovepoloms löliko u dilo: a. s. vobäds elas Schiller, Petöfy, Carlyle, Carducci, Runeberg, Smeetham, Tennyson, Addison, Loveling, Nekrasov, Saphir, Heine, Bodenstedt, Chamisso (kanits lätikelas opuboms suno).

Fredobsös dö vobots at, kels blöfons, das Volapük lifon, e das valemapük obas fägon ad notodön senälis jönikün obas!

Gälobsös obis demü vobäds at, kels blöfoms, das vp lifom, e das väpük obas binom fägik, al sepükön senälis jönikün obas !

Votükams Volapüka no dalons neletön plägi e paki. If studoy votükamis, küpoy, das — to cein tonatas: t e r — nemödikos pevotükon. Anu (1897, yanul) pämod pebükon: “Dukiel daü votams volapüka” (püb lä ‘Tommasi M. R.’, ‘Milano’, ‘Via S. Damiano’, 18), kel jonon votükamis dub leigätods Volapüka nuik, Volapüka rigik (büikum), Deutäna-, Litaliyäna- e Fransänapüka. Lebuk at vedükon kanitis obas, in Volapük vönädik u nulik pelautölis, reidovikis.

Votams vpa no daloms neletön plägi e pakami. If studon votamis, so tuvon, das — nekonsidü ceinam tonabas t e r — pevotos nemödikos. Anu (1897 balul) bukil pebükom: „Dukiel daü votams volapüka“ (püb lä Tommasi M. R., Milano, Via S. Damiano 18), kel jonom votamis avolapüko, evolapüko, deutiko, täliko e flentiko. Vobuk at mekom lilädik kanitis obas, pepenöl in vp vönik u nulik.

Föd seva kanitas ai ofruton Volapüki.

Födam seva kanitas oipöfidom vpe.

Kanitalekan Volapükik lifonös!

Lifö kanit vpk !

El “Vpabled lezenodik”. 1897. Nüm: 193 (yanul). Pad: 813.

Познавательные статьи:



Алгоритмические операторы Matlab

Конструирование и порядок расчёта дорожной одежды

Исследования учёных: почему помогают молитвы?

Почему терпят неудачу многие предприниматели?