КҮҮнӘ Һарин тос долахд хату.

↑

⇐ ПредыдущаяСтр 70 из 156Следующая ⇒

КҮҮНӘ ҺАРИН ТОС ДОЛАХД ХАТУ.

Күүнә кишг, зөөр бичә эдл гисн сурһмҗта үгмүд. Тосн кедү җөөлн болдг чигн, болв тер күүнә һарт бәәсн цагт, долахд хату гиҗ келгднә. Негдвәр болхла, тер эврә тосн биш, күүнә, хойрдвар, тер күүнә һарт бәәх тосн, ямаран тоснь бас медгдҗәхш, тер киртәчн болх.

КҮҮНӘ КЕРГ КҮЦӘХЛӘ, ЭВРӘ КЕРГ ЧИГН КҮЦДГ.

Күүнә керг күцәҗ, терүнд нөкд болх сана зүүхлә, терүгән эврәләһән әдл санҗ күцә гисн сурһмҗ энүнд өггдҗәнә. Кен чигн күүнә зөвинь тевчәд, терүнд нөкд болад, кергинь күцәһәд өгхлә, эврә керг чигн күцгддгнь лавта болҗ һарна.

КҮҮНӘ КЕЛН ХОРТА, КҮРНИН МАХН ЗААРТА.

Энүнд хорта, ховч келнә тускар келгдҗәнә, терүг күрнин заарта махнла дүңцүлҗәнә. Эн үлгүриг келхләрн, үгин даршлһ орулад, үгд чимр болтха гиһәд келсн үлгүр. Болв күүнә келн хортань чигн, күрн аңгин махнь йир заарта болдгнь чигн бас кенд болвчн лавта медгднә. Юн чигн аңгин махна заарас күрнин махна заарнь йир даву догшн төләднь, күрнин махн заарта гиҗ келгднә. Тегәд хорта, ходрң келиг күрнин махнла дүңцүлҗәнә.

КҮҮНӘ КЕЛНД ХАД ЧОЛУН ЧИГН ХАМХРДГ.

Күүнә келнәс догшн хорта юмн уга гиҗ, кезәнәс нааран келгддмн. Тегәд чигн олн әмтнә келн ор эзлгч хааг чигн ормаснь көндәһәд, ширәһәснь буулһад оркдмн гиҗ бас келгднә. Күүнә келн тедү дүңгә күчтә, келнә күчинь хад чолунла дүңцүлҗ келҗәнә. Келәрн күүг харсад авад чигн оркҗ болхмн, келәрн кесг олн цергүд дахулад, өшәтнә өмнәснь дәврәд орҗ чигн болхмн.

КҮҮНӘ МУ СЕКХЛӘ — ЭВРӘ МУУҺИН ТҮЛКҮР.

Күүнә му келхәсн түрүләд, эврән бийән бас шинҗлҗ хәлә гисн сурһмҗта үгмүд. Кү му келхдән, күүнә му секхдән йир һавц улс хара биш бәәцхәнә. Тиим улс күүнә му секҗ келхләрн, эврәннь хамг дуту-дундан эс медсн болҗ келцхәнә. Болв кен чигн күүнә мууһинь, дуту-дундынь урдаснь меддг улс бас бәәцхәнә. Тегәд тер күүнә му секхдән һавц улс, тиим күүнә мууһинь, дуту-дундынь зааһад эркн биш келл уга бәәшгонь цугтад медгднә. Эврә дуту-дундыг бас медх кергтә гисн утхта үлгүр.

Познавательные статьи:



Психологические особенности спортивного соревнования

Приготовление дезинфицирующих растворов различной концентрации

Занятость населения и рынок труда

Социальный статус семьи и её типология