Божественная Литургия Преждеосвященных.

↑

▷ Содержание

⇐ ПредыдущаяСтр 16 из 25Следующая ⇒

Малая ектения.

Таже диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Молитва третияго антифона.

Иерей: И́же о́бщия сия́ и согла́сныя дарова́вый нам моли́твы, и́же и двема́ или́ трем согласу́ющимся о и́мени Твое́м проше́ния пода́ти обеща́вый, Сам и ны́не раб Твои́х проше́ния к поле́зному испо́лни, подая́ нам и в настоя́щем ве́це позна́ние Твоея́ и́стины, и в бу́дущем живо́т ве́чный да́руя.

Возглашение: Я́ко благ и человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Зде отверзаются двери на малый вход.

Третий антифон. Блаженны.

1. Во Ца́рствии Твое́м помяни́ нас, Го́споди, / егда́ прии́деши, во Ца́рствии Твое́м.

на 12:

1. Блаже́ни ни́щии ду́хом, / я́ко тех есть Ца́рство Небе́сное.

2. Блаже́ни пла́чущии, / я́ко ти́и уте́шатся.

на 10:

1. Блаже́ни кро́тции, / я́ко ти́и насле́дят зе́млю.

2. Блаже́ни а́лчущии и жа́ждущии пра́вды, / я́ко ти́и насы́тятся.

на 8:

1. Блаже́ни ми́лостивии, / я́ко ти́и поми́ловани бу́дут.

2. Блаже́ни чи́стии се́рдцем, / я́ко ти́и Бо́га у́зрят.

на 6:

1. Блаже́ни миротво́рцы, / я́ко ти́и сы́нове Бо́жии нареку́тся.

2. Блаже́ни изгна́ни пра́вды ра́ди, / я́ко тех есть Ца́рство Небе́сное.

на 4:

1. Блаже́ни есте́, егда́ поно́сят вам, / и изжену́т, и реку́т всяк зол глаго́л на вы, лжу́ще Мене́ ра́ди.

2. Ра́дуйтеся и весели́теся, / я́ко мзда ва́ша мно́га на Небесе́х.

1. Сла́ва Отцу́ и Сы́ну и Свято́му Ду́ху.

2. И ны́не и при́сно и во ве́ки веко́в. Ами́нь.

Малый вход с Евангелием.

Прием священник святое Евангелие, дает диакону, и тако изшедше северною страною, предыдущим им лампадам, творят малый вход, и ставше на обычном месте, приклоняют оба главы.

Диакон: Го́споду помо́лимся.

Лик: Го́споди, поми́луй.

Молитва входа.

Иерей: Влады́ко Го́споди Бо́же наш, уста́вивый на небесе́х чи́ны и во́инства А́нгел и Арха́нгел в служе́ние Твоея́ сла́вы, сотвори́ со вхо́дом нашим вхо́ду святы́х А́нгелов бы́ти, сослужа́щих нам, и сославосло́вящих Твою́ бла́гость. Я́ко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в. Аминь.

Диакон: Благослови́, влады́ко, святы́й вход.

Священник благословляя, глаголет: Благослове́н вход святы́х Твои́х всегда́, ны́не и при́сно и во ве́ки веко́в.

Посем диакон подает Евангелие священнику, и целует священник Евангелие. Исполньшуся же конечному тропарю, входит диакон посреде, и став пред иереем, возвышает мало руце и показуя святое Евангелие, глаголет велегласно: Прему́дрость, про́сти.

Таже сотворив поклонение, входит во святый олтарь диакон и созади его священник. И диакон убо полагает святое Евангелие на святей трапезе.

Входное.

Аще неделя, певцы поют: Прииди́те, поклони́мся и припаде́м ко Христу́. / Спаси́ ны, Сы́не Бо́жий, / Воскресы́й из ме́ртвых, пою́щия Ти, / аллилу́иа. Единожды.

Таже обычныя тропари. Священник же глаголет молитву сию:

Молитва Трисвятаго пения.

Иерей: Бо́же Святы́й, и́же во святы́х почива́яй, и́же трисвяты́м гла́сом от Серафи́мов воспева́емый и от Херуви́мов славосло́вимый, и от вся́кия Небе́сныя Си́лы покланя́емый, и́же от небытия́ во е́же бы́ти приведы́й вся́ческая, созда́вый челове́ка по о́бразу Твоему́ и по подо́бию, и вся́ким Твои́м дарова́нием украси́вый, дая́й прося́щему прему́дрость и ра́зум, и не презира́яй согреша́ющаго, но полага́яй на спасе́ние покая́ние, сподо́бивый нас, смире́нных и недосто́йных раб Твои́х, и в час сей ста́ти пред сла́вою свята́го Твоего́ же́ртвенника, и до́лжное Тебе́ поклоне́ние и славосло́вие приноси́ти. Сам, Влады́ко, приими́ и от уст нас, гре́шных, Трисвяту́ю песнь, и посети́ ны бла́гостию Твое́ю, прости́ нам вся́кое согреше́ние во́льное же и нево́льное, освяти́ на́ша ду́ши и телеса́, и даждь нам в преподо́бии служи́ти Тебе́ вся дни живота́ на́шего, моли́твами святы́я Богоро́дицы, и всех святы́х, от ве́ка Тебе́ благоугоди́вших.

Егда же певцы приидут в последний тропарь, глаголет диакон ко иерею, приклонь вкупе главу и орарь в руце держа треми персты: Благослови́, влады́ко, вре́мя Трисвята́го.

Иерей же, зна́менуя его, глаголет: Я́ко свят еси́, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно.

Скончавшуся же тропарю, приходит диакон близ святых дверей, и наводя орарем, первее убо ко иконе Христове глаголет: Го́споди, спаси́ благочести́выя.

Лик: Го́споди, спаси́ благочести́выя.

Диакон: И услы́ши ны.

Лик: И услы́ши ны.

Таже наводит, глаголя ко вне стоящим велегласно: И во ве́ки веко́в.

Лик: Ами́нь.

Трисвятое.

Лик: Святы́й Бо́же, / Святы́й Кре́пкий, / Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, / Святы́й Кре́пкий, / Святы́й Безсме́ртный, поми́луй нас.

Певаему же Трисвятому, глаголют и сами, иерей же и диакон, Трисвятое, творяще вкупе и поклоны три пред святою трапезою.

Таже глаголет диакон ко иерею: Повели́, влады́ко.

Священник: Благослове́н гряды́й во и́мя Госпо́дне.

Диакон: Благослови́, влады́ко, Го́рний престо́л.

Иерей же: Благослове́н еси́ на престо́ле сла́вы Ца́рствия Твоего́, Седя́й на Херуви́мех всегда́, ны́не и при́сно и во ве́ки веко́в.

По исполнении Трисвятаго, пришед пред святыя двери, диакон глаголет: Во́нмем.

Иерей же возглашает: Мир всем.

И чтец глаголет: И ду́хови твоему́.

И паки диакон: Прему́дрость.

И чтец: прокимен, псалом Давидов.

Посем диакон: Прему́дрость.

И чтец надписание Апостола: Дея́ний святы́х Апо́стол чте́ние. Или: Собо́рнаго посла́ния Иа́ковля, или Петро́ва чте́ние. Или: К Ри́мляном, или к Кори́нфяном, или к Гала́том посла́ния свята́го Апо́стола Па́вла чте́ние.

И паки диакон: Во́нмем.

Апостолу же чтому, диакон, прием кадильницу и фимиам, приходит ко священнику, и прием благословение от него, кадит святую трапезу окрест, и олтарь весь, и священника.

Апостолу же исполньшуся, глаголет священник: Мир ти.

И чтец: И ду́хови твоему́.

Диакон: Прему́дрость.

И чтец: Аллилу́иа.

Молитва прежде Евангелия:

Священник: Возсия́й в сердца́х на́ших, человеколю́бче Влады́ко, Твоего́ Богоразу́мия нетле́нный свет, и мы́сленныя на́ши отве́рзи о́чи, во Ева́нгельских Твои́х пропове́даний разуме́ние. Вложи́ в нас и страх блаже́нных Твои́х за́поведей, да плотски́я по́хоти вся попра́вше, духо́вное жи́тельство про́йдем, вся, я́же ко благоугожде́нию Твоему́, и му́дрствующе и де́юще. Ты бо еси́ просвеще́ние душ и теле́с на́ших, Христе́ Бо́же, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно и во ве́ки веко́в. Ами́нь.

Диакон: Благослови́, влады́ко, благовести́теля свята́го Апо́стола и Евангели́ста, имярек.

Священник, знаменуя его, глаголет: Бог, моли́твами свята́го, сла́внаго, всехва́льнаго Апо́стола и Евангели́ста, имярек, да да́ст тебе́ глаго́л благовеству́ющему си́лою мно́гою, во исполне́ние Ева́нгелия возлю́бленнаго Сы́на Своего́, Го́спода на́шего Иису́са Христа́.

И подает ему святое Евангелие.

Диакон же рек: Ами́нь.

Иерей: Прему́дрость, про́сти, услы́шим свята́го Ева́нгелия.

Таже: Мир всем.

Людие: И ду́хови твоему́.

Диакон: От имярек свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Священник: Во́нмем.

Чтение Евангелия.

Священник: Мир ти, благовеству́ющему.

Лик: Сла́ва Тебе́, Го́споди, сла́ва Тебе́.

Ектения сугубая.

Диакон: Рцем вси́ от всея́ души́, и от всего́ помышле́ния на́шего рцем.

Лик: Го́споди, поми́луй.

Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.

Лик: Го́споди, поми́луй.

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имя рек), и о всей во Христе́ бра́тии на́шей.

Лик: Го́споди, поми́луй, трижды.

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Лик: Го́споди, поми́луй, трижды.

Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.

Лик: Го́споди, поми́луй, трижды.

Еще́ мо́лимся о блаже́нных и приснопа́мятных святе́йших патриа́рсех правосла́вных и созда́телех свята́го хра́ма сего́ (аще во обители: святы́я оби́тели сея́), и о всех пре́жде почи́вших отце́х и бра́тиях, зде лежа́щих и повсю́ду, правосла́вных.

Лик: Го́споди, поми́луй, трижды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́ (аще во обители: святы́я оби́тели сея́).

Лик: Го́споди, поми́луй, трижды.

Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Лик: Го́споди, поми́луй, трижды.

Молитва прилежнаго моления:

Иерей: Го́споди Бо́же наш, приле́жное сие́ моле́ние приими́ от Твои́х раб, и поми́луй нас по мно́жеству ми́лости Твоея́, и щедро́ты Твоя́ низпосли́ на ны и на вся лю́ди Твоя́, ча́ющыя от Тебе́ бога́тыя ми́лости.

Возглашение: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Ектения о оглашенных:

Таже диакон: Помоли́теся, оглаше́ннии, Го́сподеви.

Лик: Го́споди, поми́луй.

Ве́рнии, о оглаше́нных помо́лимся, да Госпо́дь поми́лует их.

Лик: Го́споди, поми́луй.

Огласи́т их сло́вом и́стины.

Лик: Го́споди, поми́луй.

Откры́ет им Ева́нгелие пра́вды.

Лик: Го́споди, поми́луй.

Соедини́т их святе́й Свое́й собо́рней и апо́стольстей Це́ркви.

Лик: Го́споди, поми́луй.

Спаси́, поми́луй, заступи́ и сохрани́ их, Бо́же, Твое́ю благода́тию.

Лик: Го́споди, поми́луй.

Оглаше́ннии, главы ва́ша Го́сподеви приклони́те.

Лик: Тебе́, Го́споди.

Молитва о оглашенных:

Иерей: Го́споди Бо́же наш, и́же на небесе́х живы́й и призира́яй на вся дела́ Твоя́, при́зри на рабы́ Твоя́ оглаше́нныя, прикло́ньшыя своя́ вы́я пред Тобо́ю и даждь им ле́гкий яре́м, сотвори́ их у́ды че́стны святы́я Твоея́ Це́ркве и сподо́би их ба́ни пакибытия́, оставле́ния грехо́в и оде́жди нетле́ния, в позна́ние Тебе́, и́стиннаго Бо́га на́шего.

Возглашение: Да и ти́и с на́ми сла́вят пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в.

Лик: Ами́нь.

И простирает антиминс священник.

ЛИТУРГИЯ ВЕРНЫХ.

Диакон: Ели́цы оглаше́ннии, изыди́те, оглаше́ннии изыди́те, ели́цы оглаше́ннии изыди́те. Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Прему́дрость.

Молитва верных первая:

Иерей: Ты, Го́споди, показа́л еси́ нам вели́кое сие́ спасе́ния та́инство. Ты сподо́бил еси́ нас, смире́нных и недосто́йных раб Твои́х, бы́ти служи́телем свята́го Твоего́ же́ртвенника. Ты удовли́ нас, си́лою свята́го Твоего́ Ду́ха, в слу́жбу сию́, да неосужде́нно ста́вше пред свято́ю сла́вою Твое́ю, принесе́м Ти же́ртву хвале́ния. Ты бо еси́ де́йствуяй вся во всех. Да́ждь, Го́споди, и о на́ших гресе́х, и о людски́х неве́дениих, прия́тней бы́ти же́ртве на́шей, и благоприя́тней пред Тобо́ю.

Возглашение: Я́ко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

[Егда священник един служит, сия не глаголет:

О свы́шнем ми́ре и спасе́нии душ на́ших, Го́споду помо́лимся.

О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.

О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

О изба́витися нам от вся́кия ско́рби, гне́ва и ну́жды, Го́споду помо́лимся.]

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Прему́дрость.

Входит диакон в олтарь северными дверьми.

Молитва верных вторая:

Иерей: Бо́же, посети́вый в ми́лости и щедро́тах смире́ние на́ше, поста́вивый нас смире́нных и гре́шных и недосто́йных раб Твои́х пред свято́ю сла́вою Твое́ю, служи́ти свято́му же́ртвеннику Твоему́. Ты укрепи́ нас си́лою Свята́го Твоего́ Ду́ха в слу́жбу сию́, и да́ждь нам сло́во во отверзе́ние у́ст на́ших, во е́же призыва́ти благода́ть Свята́го Твоего́ Ду́ха на хотя́щия предложи́тися Да́ры.

Возглашение: Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

И отверзаются святыя двери.

Херувимская песнь.

Лик: И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.

Таже, Херувимстей песни певаемей, диакон, прием кадильницу и фимиам вложив, приходит ко священнику, и прием благословение от него, кадит святую трапезу окрест, и олтарь весь, и иконостас, таже священника, лики и люди, глаголет же и 50-й псалом, и тропари умилительныя, елико изволит.

Священник же глаголет тайно молитву сию:

Никто́же досто́ин от связа́вшихся плотски́ми похотьми́ и сластьми́ приходи́ти, или́ прибли́житися, или́ служи́ти Тебе́, Царю́ Сла́вы: е́же бо служи́ти Тебе́, вели́ко и стра́шно и саме́м Небе́сным Си́лам. Но оба́че неизрече́ннаго ра́ди и безме́рнаго Твоего́ человеколю́бия, непрело́жно и неизме́нно был еси́ Челове́к, и Архиере́й нам был еси́: и служе́бныя сея́ и безкро́вныя же́ртвы священноде́йствие пре́дал еси́ нам, я́ко Влады́ка всех. Ты бо еди́н, Го́споди Бо́же наш, влады́чествуеши небе́сными и земны́ми, и́же на престо́ле Херуви́мсте носи́мый, и́же Серафи́мов Госпо́дь, и Ца́рь Изра́илев, и́же Еди́н свят, и во святы́х почива́яй. Тя у́бо молю́, Еди́наго блага́го и благопослушли́ваго: при́зри на мя, гре́шнаго и непотре́бнаго раба́ Твоего́, и очи́сти мою́ ду́шу и се́рдце от со́вести лука́выя, и удовли́ мя, си́лою свята́го Твоего́ Ду́ха, облече́на благода́тию свяще́нства, предста́ти святе́й Твое́й сей трапе́зе, и священноде́йствовати Свято́е и Пречи́стое Твое́ Те́ло и Честну́ю Кровь. К Тебе́ бо прихожду́ прикло́нь мою́ вы́ю, и молю́ Ти ся, да не отврати́ши лица́ Твоего́ от мене́, ниже́ отри́неши мене́ от о́трок Твои́х, но сподо́би принесе́нным Тебе́ бы́ти, мно́ю гре́шным и недосто́йным рабо́м Твои́м, даро́м сим. Ты бо еси́ принося́й и приноси́мый, и прие́мляй и раздава́емый, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в. Ами́нь.

Исполньшимся же молитве и каждению, священник и диакон, ставше пред святою трапезою, глаголют Херувимскую песнь трижды, по коемждо же скончании, покланяются по единощи.

Таже отходят в предложение, предходящу диакону, и кадит святая.

Диакон глаголет ко священнику: Возми́, влады́ко.

И священник, взем возду́х, возлагает на левое рамо его, глаголя: Возми́те ру́ки ва́ша во свя́тая и благослови́те Го́спода.

Таже святый дискос прием, поставляет на главу диакона. Сам же святый потир в руце приемлет, и исходят оба северною страною молящеся, предходящим им лампадам.

Великий вход.

Диакон глаголет: Вели́каго господи́на и отца́ на́шего имярек, Святе́йшаго Патриа́рха Моско́вскаго и всея́ Ру́си, и господи́на на́шего преосвяще́ннейшаго имярек, митрополи́та (или архиепи́скопа, или епи́скопа егоже есть область), да помяне́т Госпо́дь Бог во Ца́рствии Свое́м всегда́, ны́не и при́сно и во ве́ки веко́в.

Таже священник: Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, бра́тию и прихо́жан свята́го хра́ма сего́ (или: святы́я оби́тели сея́), и всех вас правосла́вных христиа́н, да помяне́т Госпо́дь Бог во Ца́рствии Свое́м всегда́, ны́не и при́сно и во ве́ки веко́в.

Лик: Аминь.

И конец Херувимския песни: Я́ко да Царя́ всех поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.

Вшед же диакон внутрь святых дверий, стоит одесную, и хотящу священнику внити, глаголет к нему диакон: Да помяне́т Госпо́дь Бог свяще́нство твое́ во Ца́рствии Свое́м всегда́, ны́не и при́сно и во ве́ки веко́в.

И священник к нему: Да помяне́т Госпо́дь Бог священнодиа́конство твое́ во Ца́рствии Свое́м всегда́, ны́не и при́сно и во ве́ки веко́в.

И священник убо поставляет святый потир на святую трапезу, глаголя:

Благообра́зный Ио́сиф, с дре́ва снем Пречи́стое Те́ло Твое́, плащани́цею чи́стою обви́в, и благоуха́ньми во гро́бе но́ве покры́в, положи́.

Во гро́бе пло́тски, во а́де же с душе́ю я́ко Бог, в раи́ же с разбо́йником, и на престо́ле был еси́, Христе́, со Отце́м и Ду́хом, вся исполня́яй неопи́санный.

Я́ко живоно́сец, я́ко рая́ красне́йший, вои́стинну и черто́га вся́каго ца́рскаго показа́ся светле́йший, Христе́, гроб Твой, исто́чник на́шего воскресе́ния.

Таже возду́х от диаконя рама взем, и покадив покрывает им святая, глаголя: Благообра́зный Ио́сиф:

И кадит святая трижды, глаголя: Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.

И отдав кадильницу, глаголет диакону: Помяни́ мя, бра́те и сослужи́телю.

И диакон к нему: Да помяне́т Госпо́дь Бог свяще́нство твое́ во Ца́рствии Свое́м. Помоли́ся о мне́, влады́ко святы́й.

И священник: Дух Святы́й на́йдет на тя, и Си́ла Вы́шняго осени́т тя.

И диакон: То́йже Дух соде́йствует нам вся дни живота́ на́шего.

И паки тойжде: Помяни́ мя, влады́ко святы́й.

И священник: Да помяне́т тя Госпо́дь Бог во Ца́рствии Свое́м всегда́, ны́не и при́сно и во ве́ки веко́в.

Диакон же, рек: Ами́нь.

И затворяет царская врата.

Ектения просительная.

Диакон: Испо́лним моли́тву на́шу Го́сподеви.

Лик: Го́споди, поми́луй.

О предложе́нных Честны́х Даре́х, Го́споду помо́лимся.

Лик: Го́споди, поми́луй.

О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.

Лик: Го́споди, поми́луй.

О изба́витися нам от вся́кия ско́рби, гне́ва и ну́жды, Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Дне всего́ соверше́нна, свя́та, ми́рна и безгре́шна, у Го́спода про́сим.

Лик: Пода́й, Го́споди.

А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.

Лик: Пода́й, Го́споди.

Проще́ния и оставле́ния грехо́в и прегреше́ний на́ших, у Го́спода про́сим.

Лик: Пода́й, Го́споди.

До́брых и поле́зных душа́м нашим, и ми́ра мiрови, у Го́спода про́сим.

Лик: Пода́й, Го́споди.

Про́чее вре́мя живота́ на́шего в ми́ре и покая́нии сконча́ти, у Го́спода про́сим.

Лик: Пода́й, Го́споди.

Христиа́нския кончи́ны живота́ на́шего, безболе́зненны, непосты́дны, ми́рны и до́браго отве́та на стра́шнем суди́щи Христо́ве про́сим.

Лик: Пода́й, Го́споди.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Молитва приношения,
по поставлении Божественных даров на святей трапезе:

Иерей: Го́споди Бо́же наш, созда́вый нас и введы́й в жизнь сию́, показа́вый нам пути во спасе́ние, дарова́вый нам Небе́сных Та́ин открове́ние. Ты бо еси́ положи́вый нас в слу́жбу сию́, си́лою Ду́ха Твоего́ Свята́го. Благоволи́ у́бо, Го́споди, бы́ти нам служи́телем но́ваго Твоего́ Заве́та, слуга́м святы́х Твои́х Та́инств. Приими́ нас, приближа́ющихся свято́му Твоему́ же́ртвеннику, по мно́жеству ми́лости Твоея́, да бу́дем досто́йни приноси́ти Тебе́ слове́сную сию́ и безкро́вную же́ртву о на́ших согреше́ниих и о людски́х неве́жествиих: ю́же прие́м во святы́й и пренебе́сный, и мы́сленный Твой же́ртвенник, в воню́ благоуха́ния, возниспосли́ нам благода́ть Свята́го Твоего́ Ду́ха. При́зри на ны, Бо́же, и ви́ждь на слу́жбу сию́ на́шу, и приими́ ю́, я́коже прия́л еси́ А́велевы да́ры, Но́евы же́ртвы, Авраа́мова всепло́дия, Моисе́ова и Ааро́нова свяще́нства, Самуи́лова мирная. Я́коже прия́л еси́ от святы́х Твои́х Апо́стол и́стинную сию́ слу́жбу, си́це и от ру́к нас, гре́шных, приими́ Да́ры сия в бла́гости Твое́й, Го́споди, я́ко да сподо́бльшеся служи́ти без поро́ка свято́му Твоему́ же́ртвеннику, обря́щем мзду ве́рных и му́дрых строи́телей в день стра́шный воздая́ния Твоего́ пра́веднаго.

Возглашение: Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Лик: Ами́нь.

Иерей: Мир всем.

Лик: И ду́хови твоему́.

Диакон: Возлю́бим друг дру́га, да единомы́слием испове́мы.

Лик: Отца́ и Сы́на и Свята́го Ду́ха, / Тро́ицу единосу́щную / и неразде́льную.

И священник покланяется трижды, глаголя тайно: Возлюблю́ Тя, Го́споди, кре́посте моя́, Госпо́дь утвержде́ние мое́ и прибе́жище мое́. Трижды.

И глаголет: Христо́с посреде́ нас.

И отвещает целовавый: И есть, и бу́дет.

Диакон: Две́ри, две́ри, прему́дростию во́нмем.

Священник же отверзает завесу царских врат и воздвизает возду́х и держит над Святыми Дарми, потрясающе, и глаголюще к себе, якоже и людие:

Исповедание веры:

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Святое Возношение:

Диакон: Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.

Лик: Ми́лость ми́ра, / же́ртву хвале́ния.

И священник возглашение: Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха, бу́ди со все́ми ва́ми.

Лик: И со ду́хом твои́м.

Священник: Горе́ име́им сердца́.

Лик: И́мамы ко Го́споду.

Священник: Благодари́м Го́спода.

Лик: Досто́йно и пра́ведно есть / покланя́тися Отцу́ и Сы́ну, и Свято́му Ду́ху, / Тро́ице единосу́щней и неразде́льней.

Священник приклонься молится тайно:

Сый Влады́ко, Го́споди Бо́же О́тче Вседержи́телю покланя́емый! Досто́йно я́ко вои́стинну, и пра́ведно, и ле́по великоле́пию святы́ни Твоея́, Тебе́ хвали́ти, Тебе́ пе́ти, Тебе́ благослови́ти, Тебе́ кла́нятися, Тебе́ благодари́ти, Тебе́ сла́вити еди́наго вои́стинну су́щаго Бо́га, и Тебе́ приноси́ти се́рдцем сокруше́нным и ду́хом смире́ния слове́сную сию́ слу́жбу на́шу, я́ко Ты еси́ дарова́вый нам позна́ние Твоея́ и́стины. И кто дово́лен возглаго́лати силы Твоя́, слы́шаны сотвори́ти вся хвалы́ Твоя́, или́ пове́дати вся чудеса́ Твоя́ во вся́ко вре́мя. Влады́ко всех, Го́споди небесе́ и земли́, и всея́ тва́ри, ви́димыя же и неви́димыя, седя́й на престо́ле сла́вы и призира́яй бе́здны, безнача́льне, неви́диме, непостижи́ме, неопи́санне, неизме́нне, О́тче Го́спода на́шего Иису́са Христа́, вели́каго Бо́га и Спаси́теля, упова́ния на́шего, и́же есть о́браз Твоея́ бла́гости: печа́ть равнообра́зная, в себе́ показу́я Тя, Отца́, Сло́во живо́е, Бог и́стинный, преве́чная Прему́дрость, живо́т, освяще́ние, си́ла, свет и́стинный, и́мже Дух Святы́й яви́ся; Дух и́стины, сыноположе́ния дарова́ние, обруче́ние бу́дущаго насле́дия, нача́ток ве́чных благ, животворя́щая си́ла, исто́чник освяще́ния, от него́же вся тва́рь слове́сная же и у́мная укрепля́ема Тебе́ слу́жит и Тебе́ присносу́щное возсыла́ет славосло́вие, я́ко вся́ческая рабо́тна Тебе́. Тебе́ бо хва́лят А́нгели, Арха́нгели, Престо́ли, Госпо́дьствия, Нача́ла, Вла́сти, Си́лы и многоочи́тии Херуви́ми. Тебе́ предстоя́т о́крест Серафи́ми, шесть кри́л еди́ному, и шесть кри́л еди́ному; и двема́ у́бо покрыва́ют ли́ца своя, двема́ же но́ги, и двема́ лета́юще, взыва́ют еди́н ко друго́му, непреста́нными усты́, немо́лчными славослове́ньми.

Возглашение: Побе́дную песнь пою́ще, вопию́ще, взыва́юще и глаго́люще.

Лик: Свят, свят, свят Госпо́дь Савао́ф, / испо́лнь не́бо и земля́ сла́вы Твоея́; / оса́нна в вы́шних, / благослове́н Гряды́й во и́мя Госпо́дне, / оса́нна в вы́шних.

Священник молится тайно:

С си́ми блаже́нными си́лами, Влады́ко человеколю́бче, и мы́, гре́шнии, вопие́м и глаго́лем: свят еси́, я́ко вои́стинну, и пресвя́т, и несть ме́ры великоле́пию святы́ни Твоея́, и преподо́бен во всех де́лех Твои́х, я́ко пра́вдою и судо́м и́стинным вся наве́л еси́ на ны́: созда́в бо челове́ка, пе́рсть взе́м от земли́, и о́бразом Твои́м, Бо́же, поче́т, положи́л еси́ в раи́ сла́дости, безсме́ртие жи́зни и наслажде́ние ве́чных благ, в соблюде́нии за́поведей Твои́х обеща́в ему́, но преслу́шавша Тебе́, и́стиннаго Бо́га, созда́вшаго его́, и пре́лестию зми́евою привле́кшася, умерщвле́на же свои́ми прегреше́ньми, изгна́л еси́ его́ пра́ведным Твои́м судо́м, Бо́же, от рая́ в мiр сей, и отврати́л еси́ в зе́млю, от нея́же взят бысть, устроя́я ему́ е́же от пакибытия́ спасе́ние, в Саме́м Христе́ Твое́м. Не бо отврати́лся еси́ созда́ния Твоего́ в коне́ц, е́же сотвори́л еси́, Бла́же, ниже́ забы́л еси́ дела́ рук Твои́х, но посети́л еси́ многообра́зне, ра́ди милосе́рдия ми́лости Твоея́. Проро́ки посла́л еси́, сотвори́л еси́ си́лы святы́ми Твои́ми, в ко́емждо ро́де благоугоди́вшими Тебе́. Глаго́лал еси́ нам усты́ раб Твои́х проро́ков, предвозвеща́я нам хотя́щее бы́ти спасе́ние. Зако́н дал еси́ в по́мощь, А́нгелы поста́вил еси́ храни́тели. Егда́ же прии́де исполне́ние време́н, глаго́лал еси́ нам саме́м Сы́ном Твои́м, И́мже и ве́ки сотвори́л еси́, И́же сый сия́ние сла́вы Твоея́ и начерта́ние ипоста́си Твоея́, нося́ же вся глаго́лом си́лы Своея́, не хище́ние непщева́ е́же бы́ти ра́вен Тебе́, Бо́гу и Отцу́, но Бог сый преве́чный, на земли́ яви́ся и челове́ком споживе́. И от Де́вы Святы́я вопло́щся, истощи́ Себе́, зра́к раба́ прие́м, сообра́зен быв те́лу смире́ния на́шего, да нас сообра́зны сотвори́т о́бразу сла́вы Своея́. Поне́же бо челове́ком грех вни́де в мiр и грехо́м смерть, благоволи́ Единоро́дный Твой Сын, сый в не́дрех Тебе́, Бо́га и Отца́, быв от жены́, Святы́я Богоро́дицы и Присноде́вы Мари́и, быв под зако́ном, осуди́ти грех во пло́ти Свое́й, да во Ада́ме умира́юще, оживотворя́тся в саме́м Христе́ Твое́м. И пожи́в в мiре сем, дав повеле́ния спаси́тельная, отста́вив нас пре́лести и́дольския, приведе́ в позна́ние Тебе́, и́стиннаго Бо́га и Отца́, стяжа́в нас Себе́, лю́ди избра́нны, царское свяще́ние, язы́к свят. И очи́стив водо́ю, и освяти́в Ду́хом Святы́м, даде́ Себе́ изме́ну сме́рти, в не́йже держи́ми бе́хом, про́дани под грехо́м, и соше́д кресто́м во ад, да испо́лнит Собо́ю вся, разреши́ боле́зни сме́ртныя. И воскре́с в тре́тий день, и путь сотвори́в вся́кой пло́ти к воскресе́нию из ме́ртвых, зане́ не бя́ше мо́щно держи́му бы́ти тле́нием нача́льнику жи́зни, бысть нача́ток уме́рших, перворожде́н из ме́ртвых, да бу́дет Сам вся, во всех пе́рвенствуяй. И возше́д на небеса́, се́де одесну́ю вели́чествия Твоего́ на высо́ких, и́же и прии́дет возда́ти кому́ждо по дело́м его́. Оста́ви же нам воспоминания спаси́тельнаго Своего́ страда́ния сия́, я́же предложи́хом по Его́ за́поведем. Хотя́ бо изы́ти на во́льную и приснопа́мятную, и животворя́щую Свою́ сме́рть, в но́щь, в ню́же предая́ше Себе́ за живо́т мiра, прие́м хлеб на свя́тыя Своя́ и пречи́стыя ру́ки, показа́в Тебе́, Бо́гу и Отцу́, благодари́в, благослови́в, освяти́в, преломи́в,

И возгласно глаголет сие: даде́ святы́м Свои́м ученико́м и апо́столом, рек: приими́те, яди́те, сие́ есть Те́ло Мое́, е́же за вы ломи́мое, во оставле́ние грехо́в.

Лик: Ами́нь.

Священник втай: Подо́бне и ча́шу от плода́ ло́знаго прие́м, раствори́в, благодари́в, благослови́в, освяти́в,

И паки возглашает сие: даде́ святы́м Свои́м ученико́м и апо́столом, рек: пи́йте от нея́ вси, сия́ есть Кровь Моя́ Но́ваго заве́та, я́же за вы и за мно́ги излива́емая во оставле́ние грехо́в.

Лик: Ами́нь.

Священник приклонив главу, молится втай:

Сие́ твори́те в Мое́ воспомина́ние: ели́жды бо а́ще я́сте Хлеб сей и Ча́шу сию́ пие́те, Мою́ сме́рть возвеща́ете, Мое́ воскресе́ние испове́даете. Помина́юще у́бо, Влады́ко, и мы́ спаси́тельная Его́ страда́ния, животворя́щий Крест, тридне́вное погребе́ние, е́же из ме́ртвых воскресе́ние, е́же на небеса́ возше́ствие, е́же одесну́ю Тебе́, Бо́га и Отца́, седе́ние, и сла́вное, и стра́шное Его́ второ́е прише́ствие.

Возглашает священник: Твоя́ от Твои́х Тебе́ принося́ще о всех и за вся.

Лик: Тебе́ пое́м, / Тебе́ благослови́м, / Тебе́ благодари́м, Го́споди, / и мо́лим Ти ся, Бо́же наш.

Священник приклонив главу, молится втай:

Сего́ ра́ди, Влады́ко Пресвяты́й, и мы, гре́шнии и недосто́йнии раби́ Твои́, сподо́бльшиися служи́ти свято́му Твоему́ же́ртвеннику, не ра́ди правд на́ших, не бо сотвори́хом что́ бла́го на земли́, но ра́ди ми́лости Твоея́ и щедро́т Твои́х, я́же излия́л еси́ бога́тно на ны, дерза́юще приближа́емся свято́му Твоему́ же́ртвеннику. И предло́жше вместообра́зная свята́го Те́ла и Кро́ве Христа́ Твоего́, Тебе́ мо́лимся, и Тебе́ призыва́ем, Свя́те святы́х, благоволе́нием Твоея́ бла́гости приити́ Ду́ху Твоему́ Свято́му на ны и на предлежа́щия Да́ры сия́, и благослови́ти я́, и освяти́ти, и показа́ти.

Диакон приходит близ священника, и покланяются оба трижды пред святою трапезою, и глаголюще: Бо́же, очи́сти мя, гре́шнаго, и поми́луй мя.

Священник: Го́споди, и́же Пресвята́го Твоего́ Ду́ха в тре́тий час Апо́столом Твои́м низпосла́вый, Того́, Благи́й, не отыми́ от нас, но обнови́ нас, моля́щих Ти ся.

Диакон стих: Се́рдце чи́сто сози́жди во мне, Бо́же, и дух прав обнови́ во утро́бе мое́й.

Паки священник: Го́споди, и́же Пресвята́го Твоего́ Ду́ха:

Диакон стих: Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

И паки священник: Го́споди, и́же Пресвята́го Твоего́ Ду́ха:

Таже диакон, показуя орарем святый хлеб, глаголет тихим гласом: Благослови́, влады́ко, святы́й хлеб.

Священник же, знаменуя святый хлеб, глаголет: Хлеб у́бо сей, са́мое Честно́е Те́ло Го́спода и Бо́га и Спа́са на́шего Иису́са Христа́.

Диакон: Ами́нь. Благослови́, влады́ко, святу́ю ча́шу.

Священник же благословляя глаголет: Ча́шу же сию́, са́мую Честну́ю Кровь Го́спода и Бо́га и Спа́са на́шего Иису́са Христа́.

Диакон: Ами́нь.

Священник: Излия́нную за живо́т мiра.

Диакон: Ами́нь. Благослови́, влады́ко, обоя́.

Священник же, благословляя обоя́ Святая, глаголет: Преложи́в Ду́хом Твои́м Святы́м.

Диакон: Ами́нь, ами́нь, ами́нь. Помяни́ мя, святы́й влады́ко, гре́шнаго.

Священник же глаголет: Да помяне́т Тя Госпо́дь Бог во Ца́рствии Свое́м всегда́, ны́не и при́сно и во ве́ки веко́в.

Диакон: Ами́нь.

Священник же молится:

Нас же всех, от еди́наго хле́ба и ча́ши причаща́ющихся, соедини́ друг ко дру́гу, во еди́наго Ду́ха Свята́го прича́стие. И ни еди́наго нас в суд или́ во осужде́ние сотвори́ причасти́тися свята́го Те́ла и Кро́ве Христа́ Твоего́, но да обря́щем ми́лость и благода́ть со все́ми святы́ми, от ве́ка Тебе́ благоугоди́вшими, пра́отцы, отцы́, патриа́рхи, проро́ки, Апо́столы, пропове́дники, благове́стники, му́ченики, испове́дники, учи́тельми и со вся́ким ду́хом пра́ведным, в ве́ре сконча́вшимся.

И прием кадило, священник возглашает: Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.

И кадит пред святою трапезою трижды.

Лик поет: О Тебе́ ра́дуется, Благода́тная вся́кая тварь, / А́нгельский собор и челове́ческий род, / освяще́нный хра́ме и раю́ слове́сный, / девственная похвало́, из Нея́же Бог воплоти́ся, и Младе́нец бысть, / пре́жде век сый Бог наш: / ложесна́ бо Твоя́ престо́л сотвори́ / и чре́во Твое́ простра́ннее небе́с соде́ла. / О Тебе́ ра́дуется, Благода́тная, вся́кая тварь, сла́ва Тебе́.

Аще ли в Великий Четверток, поем ирмос, глас 6:

Стра́нствия Влады́чня, / и безсме́ртныя Трапе́зы / на го́рнем ме́сте высо́кими умы́, / ве́рнии, прииди́те, наслади́мся, / возше́дша Сло́ва, / от Сло́ва научи́вшеся, Его́же велича́ем.

В Великую Субботу, поем ирмос, глас 6:

Не рыда́й Мене́, Ма́ти, / зря́щи во гро́бе, / Его́же во чре́ве без се́мене зачала́ еси́ Сы́на: / воста́ну бо и просла́влюся / и вознесу́ со сла́вою непреста́нно, я́ко Бог, / ве́рою и любо́вию Тя велича́ющия.

Иерей же приклонься молится:

Свята́го Иоа́нна Проро́ка, Предте́чи и Крести́теля, святы́х славных и всехва́льных Апо́стол, свята́го имярек, его́же и па́мять соверша́ем, и всех святы́х Твои́х, и́хже моли́твами посети́ нас, Бо́же.

И помяни́ всех пре́жде усо́пших о наде́жди воскресе́ния жи́зни ве́чныя.

Зде священник поминает, ихже хощет, живых и умерших, о живых убо глаголет:

О спасе́нии, посеще́нии, оставле́нии грехо́в рабо́в Бо́жиих имярек.

О умерших же глаголет: О поко́и и оставле́нии грехо́в душ раб Твои́х имярек, на ме́сте све́тле, отону́дуже отбеже́ печа́ль и воздыха́ние, упоко́й, Бо́же наш.

И поко́й их, иде́же присеща́ет свет лица́ Твоего́.

По сих глаголет: Еще́ мо́лим Ти ся, помяни́, Го́споди, святу́ю Твою́ собо́рную и апо́стольскую Це́рковь, ю́же от коне́ц да́же до коне́ц вселе́нныя, и умири́ ю́, ю́же назда́л еси́ честно́ю кро́вию Христа́ Твоего́, и святы́й храм сей утверди́ да́же до сконча́ния ве́ка.

Помяни́, Го́споди, и́же да́ры сия́ Тебе́ прине́сших, и о ни́хже, и и́миже, и за ни́хже сия́ принесо́ша.

Помяни́, Го́споди, плодонося́щих и добротворя́щих во святы́х Твои́х це́рквах, и помина́ющих убо́гия: возда́ждь им бога́тыми Твои́ми и небе́сными дарова́нии, да́руй им вме́сто земны́х небе́сная, вме́сто вре́менных ве́чная, вме́сто тле́нных нетле́нная.

Помяни́, Го́споди, и́же в пусты́нях и гора́х, и верте́пех, и про́пастех земны́х.

Помяни́, Го́споди, и́же в де́встве и благогове́нии, и по́стничестве, и в чи́стем жи́тельстве пребыва́ющих.

Помяни́, Го́споди, богохрани́мую страну́ на́шу Росси́йскую и ве́рныя лю́ди ея́, да́руй нам глубо́кий и неотъе́млемый мир, возглаго́ли в сердца́х всех, и́же во вла́сти суть, блага́я о Це́ркви Твоея́ и всех лю́дех Твои́х, да в тишине́ их ти́хое и безмо́лвное житие́ поживе́м во вся́ком благоче́стии и чистоте́.

Помяни́, Го́споди, вся́кое нача́ло и власть, и и́же в пала́те бра́тию на́шу и все во́инство. Бла́гия во бла́гости соблюди́, лука́выя бла́ги сотвори́ бла́гостию Твое́ю.

Помяни́, Го́споди, предстоя́щия лю́ди, и ра́ди благосло́вных вин оста́вльшихся, и поми́луй их и нас по мно́жеству ми́лости Твоея́: сокро́вища их испо́лни вся́каго бла́га, супру́жества их в ми́ре и единомы́слии соблюди́, младе́нцы воспита́й, ю́ность наста́ви, ста́рость поддержи́, малоду́шныя уте́ши, расточе́нныя собери́, прельще́нныя обрати́, и совокупи́ святе́й Твое́й собо́рней и апо́стольстей Це́ркви. Стужа́емыя от духо́в нечи́стых свободи́, пла́вающим спла́вай, путеше́ствующим сше́ствуй, вдови́цам предста́ни, си́рых защити́, плене́нныя изба́ви, неду́гующия исцели́. На суди́щи, и в руда́х, и в заточе́ниих, и в го́рьких рабо́тах, и вся́кой ско́рби, и ну́жде, и обстоя́нии су́щих помяни́, Бо́же. И всех тре́бующих вели́каго Твоего́ благоутро́бия и лю́бящих нас, и ненави́дящих, и запове́давших нам, недосто́йным, моли́тися о них, и вся лю́ди Твоя́ помяни́, Го́споди Бо́же наш, и на вся изли́й бога́тую Твою́ ми́лость, всем подая́ я́же ко спасе́нию проше́ния. И и́хже мы не помяну́хом, неве́дением, или́ забве́нием, или́ мно́жеством име́н, сам помяни́, Бо́же, ве́дый коего́ждо во́зраст и именова́ние, ве́дый коего́ждо от утро́бы ма́тере его́. Ты бо еси́, Го́споди, по́мощь безпомо́щным, наде́жда безнаде́жным, обурева́емым спаси́тель, пла́вающим приста́нище, неду́гующим врач. Сам всем вся бу́ди, ве́дый коего́ждо, и проше́ние его́, дом и потре́бу его́. Изба́ви, Го́споди, град сей (или весь сию́, или святу́ю оби́тель сию́), и вся́кий град и страну́ от гла́да, губи́тельства, тру́са, пото́па, огня́, меча́, наше́ствия иноплеме́нных и междоусо́бныя бра́ни.

И возглашает священник: В пе́рвых помяни́, Го́споди, вели́каго господи́на и отца́ на́шего имярек, Святе́йшаго Патриа́рха Моско́вскаго и всея́ Руси́, и господи́на на́шего преосвяще́ннаго имярек, митрополи́та (или архиепи́скопа, или епи́скопа, егоже есть область), и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.

Лик поет: И всех, и вся.

Священник молится втай: Помяни́, Го́споди, вся́кое епи́скопство правосла́вных, пра́во пра́вящих сло́во Твоея́ и́стины.

Помяни́, Го́споди, по мно́жеству щедро́т Твои́х, и мое́ недосто́инство, прости́ ми вся́кое согреше́ние, во́льное же и нево́льное, и да не мои́х ра́ди грехо́в возбрани́ши благода́ти Свята́го Твоего́ Ду́ха от предлежа́щих Даро́в.

Помяни́, Го́споди, пресвитерство, е́же во Христе́ диа́конство, и весь свяще́ннический чин, и ни еди́наго же нас посрами́ши, о́крест стоя́щих свята́го Твоего́ же́ртвенника.

Посети́ нас бла́гостию Твое́ю, Го́споди, яви́ся нам бога́тыми Твои́ми щедро́тами, благорастворе́ны и поле́зны возду́хи нам да́руй, дожди́ ми́рны земли́ ко плодоно́сию да́руй. Благослови́ вене́ц ле́та бла́гости Твоея́, утоли́ раздо́ры церкве́й, угаси́ шата́ния язы́ческая, ерети́ческая воста́ния ско́ро разори́ си́лою Свята́го Твоего́ Ду́ха. Всех нас приими́ в Ца́рство Твое́, сы́ны све́та и сы́ны дне показа́вый, Твой мир и Твою́ любо́вь да́руй нам, Го́споди Бо́же наш, вся бо возда́л еси́ нам.

Возглашает священник: И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в.

Лик: Ами́нь.

Священник, обращься ко дверем и благословляя, глаголет: И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.

Лик: И со ду́хом твои́м.

Ектения просительная:

Диакон: Вся святы́я помяну́вше, па́ки и па́ки ми́ром Го́споду помо́лимся.

Лик: Го́споди, поми́луй.

О принесе́нных и освяще́нных Честны́х Даре́х, Го́споду помо́лимся.

Лик: Го́споди, поми́луй.

Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.

Лик: Го́споди, поми́луй.

О изба́витися нам от вся́кия ско́рби, гне́ва и ну́жды, Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Дне всего́ соверше́нна, свя́та, ми́рна и безгре́шна, у Го́спода про́сим.

Лик: Пода́й, Го́споди.

А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.

Лик: Пода́й, Го́споди.

Проще́ния и оставле́ния грехо́в и прегреше́ний на́ших, у Го́спода про́сим.

Лик: Пода́й, Го́споди.

До́брых и поле́зных душа́м нашим, и ми́ра мiрови, у Го́спода про́сим.

Лик: Пода́й, Го́споди.

Про́чее вре́мя живота́ на́шего в ми́ре и покая́нии сконча́ти, у Го́спода про́сим.

Лик: Пода́й, Го́споди.

Христиа́нския кончи́ны живота́ на́шего, безболе́знены, непосты́дны, ми́рны, и до́браго отве́та на стра́шнем суди́щи Христо́ве про́сим.

Лик: Пода́й, Го́споди.

Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник молится втай:

Бо́же наш, Бо́же спаса́ти, Ты нас научи́ благодари́ти Тя досто́йно о благодея́ниих Твои́х, и́хже сотвори́л еси́ и твори́ши с на́ми. Ты, Бо́же наш, прие́мый Да́ры сия́, очи́сти нас от вся́кия скве́рны пло́ти и ду́ха, и научи́ соверша́ти святы́ню в стра́се Твое́м, я́ко да чи́стым свиде́тельством со́вести на́шея, прие́млюще ча́сть святы́нь Твои́х, соедини́мся свято́му Те́лу и Кро́ви Христа́ Твоего́. И прие́мше их досто́йне, и́мамы Христа́ живу́ща в сердца́х на́ших, и бу́дем храм Свята́го Твоего́ Ду́ха. Ей, Бо́же наш, и да ни еди́наго же нас пови́нна сотвори́ши, стра́шным Твои́м сим и небе́сным Та́йнам, ниже́ не́мощна душе́ю и те́лом, от е́же недосто́йне сих причаща́тися. Но да́ждь нам да́же до после́дняго на́шего издыха́ния, досто́йне приима́ти часть святы́нь Твои́х в напу́тие жи́зни ве́чныя, во отве́т благоприя́тен, и́же на стра́шнем суди́щи Христа́ Твоего́, я́ко да и мы со все́ми святы́ми, от ве́ка Тебе́ благоугоди́вшими, бу́дем причастницы ве́чных Твои́х благ, и́хже угото́вал еси́ лю́бящим Тя, Го́споди.

Священник возглашает: И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати.

Людие: О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Лик: Ами́нь.

Таже: Мир всем.

Лик: И ду́хови твоему́.

Диакон: Главы́ ва́ша Го́сподеви приклони́те.

Лик: Тебе́, Го́споди.

Священник молится:

Влады́ко Го́споди, О́тче щедро́т и Бо́же вся́каго утеше́ния, прикло́ньшия Тебе́ своя́ главы́ благослови́, освяти́, соблюди́, укрепи́, утверди́, от вся́каго де́ла лука́ва отста́ви, вся́кому же де́лу благо́му сочета́й, и сподо́би неосужде́нно причасти́тися пречи́стых сих и животворя́щих Твои́х Та́ин, во оставле́ние грехо́в, в Ду́ха Свята́го прича́стие.

Возглашение: Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Лик: Ами́нь.

Священник молится:

Вонми́, Го́споди Иису́се Христе́ Бо́же наш, от свята́го жили́ща Твоего́, и от престо́ла сла́вы Ца́рствия Твоего́, и прииди́ во е́же освяти́ти нас, и́же горе́ со Отце́м седя́й, и зде нам неви́димо спребыва́яй. И сподо́би держа́вною Твое́ю руко́ю препода́ти нам Пречи́стое Те́ло Твое́ и Честну́ю Кровь, и на́ми всем лю́дем.

Сей молитве глаголемей, диакон, стояй пред святыми дверьми, опоясуется орарем крестовидно. Таже покланяется священник, подобне и диакон, на немже стоит месте, глаголюща тайно, трижды: Бо́же, очи́сти мя, гре́шнаго, и поми́луй мя.

Затворяются Царские врата завесою.

Диакон возглашает: Во́нмем.

Священник же, вознося Святый Хлеб, возглашает: Свята́я святы́м.

Лик: Еди́н свят, / еди́н Госпо́дь, / Иису́с Христо́с, / во сла́ву Бо́га Отца́. / Ами́нь.

И поют лицы киноник дне, или святаго.

Диакон глаголет: Раздроби́, влады́ко, Святы́й Хлеб.

Священник же, раздробляя и́ на четыре части, глаголет: Раздробля́ется и разделя́ется А́гнец Бо́жий, раздробля́емый и неразделя́емый, всегда́ ядо́мый и никогда́же иждива́емый, но причаща́ющияся освяща́яй.

Диакон глаголет: Испо́лни, влады́ко, святы́й поти́р.

Священник же: Исполне́ние Ду́ха Свята́го.

Диакон: Ами́нь.

И приемля теплоту, глаголет ко священнику: Благослови́, влады́ко, теплоту́.

Священник же благословляет, глаголя: Благослове́нна теплота́ святы́х Твои́х всегда́, ны́не и при́сно и во ве́ки веко́в. Ами́нь.

И диакон вливает, глаголя: Теплота́ ве́ры испо́лнь Ду́ха Свята́го. Ами́нь.

Причащение во олтаре.

Священник же глаголет: Диа́коне, приступи́.

Диакон: Се прихожду́ к безсме́ртному Царю́ и Бо́гу на́шему.

Священник же, держа Святый Хлеб, дает диакону. Диакон, приемлет Святый Хлеб, глаголя: Препода́ждь ми, влады́ко, Честно́е и Свято́е Те́ло Го́спода и Бо́га и Спа́са на́шего Иису́са Христа́.

Священник же глаголет: Имярек, священнодиа́кону, преподае́тся честно́е и свято́е и пречи́стое Те́ло Го́спода и Бо́га и Спа́са на́шего Иису́са Христа́, во оставле́ние грехо́в его́ и в жизнь ве́чную.

И отходит, и молится, яко и священник, глаголя: Ве́рую, Го́споди, и испове́дую:

Подобне взем и священник едину частицу Святаго Хлеба, глаголет: Се прихожду́ к безсме́ртному Царю́ и Бо́гу на́шему.

Честно́е и пресвято́е Те́ло Го́спода и Бо́га и Спа́са на́шего Иису́са Христа́ преподае́тся мне, имярек, свяще́ннику, во оставле́ние грехо́в мои́х и в жизнь ве́чную.

И приклонив главу молится, глаголя: Ве́рую, Го́споди, и испове́дую:

И тако причащаются в руках держимаго со страхом и всяцем утверждением. Таже священник глаголет: Се па́ки прихожду́ к безсме́ртному Царю́ и Бо́гу на́шему.

Таже священник восклонься приемлет обема рукама с покровцем святый потир и причащается трижды из него, глаголя: Честны́я и святы́я Кро́ве Го́спода и Бо́га и Спа́са на́шего Иису́са Христа́, причаща́юся аз, раб Бо́жий, свяще́нник имярек, во оставле́ние грехо́в мои́х и в жизнь ве́чную. Ами́нь.

И тако свои устне и край священнаго потира в руку держимым платом отер, глаголет: Се прикосну́ся устна́м мои́м, и оты́мет беззако́ния моя́, и грехи́ моя́ очи́стит.

Таже призывает диакона, глаголя: Диа́коне, приступи́.

И диакон приходит и покланяется единою, глаголя: Се па́ки прихожду́ к безсме́ртному Царю́ и Бо́гу на́шему. И: Препода́ждь ми, влады́ко, честну́ю и святу́ю Кровь Го́спода и Бо́га и Спа́са на́шего Иису́са Христа́.

И священник глаголет: Причаща́ется раб Бо́жий, диа́кон имярек, честны́я и святы́я Кро́ве Го́спода и Бо́га и Спа́са на́шего Иису́са Христа́, во оставле́ние грехо́в свои́х и в жизнь ве́чную.

Причастившуся же диакону, глаголет священник: Се прикосну́ся устна́м твои́м, и оты́мет беззако́ния твоя́, и грехи́ твоя́ очи́стит.

Зри. Подобает ведати, яко аще суть хотящии причащатися святых таин, раздробляет священник две части Святаго Агнца оставшия, еже НИ, и еже КА, на малыя частицы, яко быти всем причастником довольно, и тако влагает их во святую чашу.

И покрывает святый потир покровцем, подобне и на святый дискос возлагает звездицу и покровцы. Таже глаголет молитву: Благодари́м Тя, Влады́ко человеколю́бче:

Причащение в храме.

И тако отверзаются двери святаго олтаря. И диакон, поклонився единою, приемлет потир с благоговением, и приходит во двери, и вознося святый потир, показует и́ людем, глаголя: Со стра́хом Бо́жиим и ве́рою приступи́те.

Лик: Благослове́н Гряды́й во и́мя Госпо́дне, / Бог Госпо́дь и яви́ся нам.

Священник же молится: Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.

Таже: Ве́чери Твоея́ та́йныя днесь, Сы́не Бо́жий, / прича́стника мя приими́; / не бо враго́м Твои́м та́йну пове́м, ни лобза́ния Ти дам, я́ко Иу́да, / но я́ко разбо́йник испове́даю Тя: / помяни́ мя, Го́споди, во Ца́рствии Твое́м.

Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.

Таже приступают хотящии причащатися. И идут един по единому, и покланяются со всяцем умилением и страхом, согбенне руце к персем имуще, таже приемлет кийждо Божественныя Тайны. Священник же, причащая его, глаголет:

Причаща́ется раб Бо́жий, имярек, честна́го и свята́го Те́ла и Кро́ве Го́спода и Бо́га и Спа́са на́шего Иису́са Христа́, во оставле́ние грехо́в свои́х и в жизнь ве́чную.

И диакон отирает ему устне платом. И целует причастивыйся святую чашу, и поклонився отходит. И тако причащаются вси.

Лик же поет по обычаю: Те́ло Христо́во приими́те, / Исто́чника безсме́ртнаго вкуси́те. Аллилу́иа.Трижды.

По причащении.

По причащении же, входит иерей во святый олтарь, и поставляет Святая на святем престоле.

Тогда прием диакон святый дискос верху святаго потира и глаголя воскресныя песни сия: Воскресе́ние Христо́во ви́девше: и Свети́ся, свети́ся, но́вый Иерусали́ме: и О Па́сха ве́лия и свяще́ннейшая:

Отирает святою гу́бою зело добре, глаголя словеса сия: Отмы́й, Го́споди, грехи́ помина́вшихся зде́ Кро́вию Твое́ю Честно́ю, моли́твами святы́х Твои́х.

Священник же благословляет люди, возглашая: Спаси́, Бо́же, лю́ди Твоя́, и благослови́ достоя́ние Твое́.

И обращается священник ко святей трапезе и кадит трижды, глаголя в себе: Вознеси́ся на Небеса́, Бо́же, и по всей земли́ сла́ва Твоя́.

Лик же поет: Ви́дехом свет и́стинный, / прия́хом Ду́ха Небе́снаго, / обрето́хом ве́ру и́стинную, / неразде́льней Тро́ице покланя́емся, / Та бо нас спасла́ есть.

Священник же, зря на люди, глаголет тайно: Благослове́н Бог наш:

И возгласно: Всегда́, ны́не и при́сно и во ве́ки веко́в.

Лик: Ами́нь.

Да испо́лнятся уста́ на́ша / хвале́ния Твоего́ Го́споди, / я́ко да пое́м сла́ву Твою́, / я́ко сподо́бил еси́ нас причасти́тися / Святы́м Твои́м, Боже́ственным, безсме́ртным и животворя́щим Та́йнам, / соблюди́ нас во Твое́й святы́ни / весь день поуча́тися пра́вде Твое́й. / Аллилу́иа, аллилу́иа, аллилу́иа.

И изшед диакон северною дверию,
и став на обычном месте, глаголет:

Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Таже, причащению совершившуся, священник молится:

Благодари́м Тя, Го́споди Бо́же наш, о причаще́нии святы́х пречи́стых, безсме́ртных и небе́сных Твои́х Та́ин, и́хже дал еси́ нам во благодея́ние, и освяще́ние, и исцеле́ние душ и теле́с на́ших. Сам, Влады́ко всех, даждь бы́ти нам прича́стию свята́го Те́ла и Кро́ве Христа́ Твоего́ в ве́ру непосты́дну, в любо́вь нелицеме́рну, в преумноже́ние прему́дрости, во исцеле́ние души́ и те́ла, во отгна́ние вся́каго сопроти́внаго, в снабде́ние за́поведей Твои́х, во отве́т благоприя́тен, и́же на стра́шнем суди́щи Христа́ Твоего́.

Иерей же, согнув антиминс и прямо держа Евангелие, творит над ним крест.

Возглашает: Я́ко Ты еси́ освяще́ние на́ше, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Иерей: С ми́ром изы́дем.

Лик: О и́мени Госпо́дни.

Диакон: Го́споду помо́лимся.

Лик: Го́споди, поми́луй.

Молитва заамвонная возгласно:

Иерей: Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́, и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты те́х воспросла́ви Боже́ственною Твое́ю си́лою, и не оста́ви нас, упова́ющих на Тя. Мир мiрови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́ Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Священник убо входит святыми дверьми, и отшед в предложение, глаголет настоящую молитву:

Молитва, внегда потребити святая:

Испо́лнися и соверши́ся ели́ко по на́шей си́ле, Христе́ Бо́же наш, Твоего́ смотре́ния та́инство. Име́ем бо сме́рти Твоея́ па́мять, ви́дехом воскресе́ния Твоего́ о́браз, напо́лнихомся безконе́чныя Твоея́ жи́зни, наслади́хомся неистоща́емыя Твоея́ пи́щи, ея́же и в бу́дущем ве́це всем нам сподо́битися благоволи́, благода́тию безнача́льнаго Твоего́ Отца́, и Свята́го и блага́го и животворя́щаго Твоего́ Ду́ха, ны́не и при́сно и во ве́ки веко́в. Ами́нь.

Лик: Ами́нь. Таже: Бу́ди и́мя Госпо́дне благослове́но от ны́не и до ве́ка. Трижды.

И псалом 33:

Благословлю́ Го́спода на вся́кое вре́мя, / вы́ну хвала́ Его́ во усте́х мои́х. / О Го́споде похва́лится душа́ моя́, / да услы́шат кро́тцыи и возвеселя́тся. / Возвели́чите Го́спода со мно́ю / и вознесе́м и́мя Его́ вку́пе. / Взыска́х Го́спода и услы́ша мя, / и от всех скорбе́й мои́х изба́ви мя. / Приступи́те к Нему́ и просвети́теся, / и ли́ца ва́ша не постыдя́тся. / Сей ни́щий воззва́, и Госпо́дь услы́ша и́, / и от всех скорбе́й eго́ спасе́ и́. / Ополчи́тся А́нгел Госпо́день о́крест боя́щихся Его́, / и изба́вит их. / Вкуси́те и ви́дите, я́ко благ Госпо́дь; / блаже́н муж, и́же упова́ет Нань. / Бо́йтеся Го́спода, вси святи́и Его́, / я́ко несть лише́ния боя́щимся Его́. / Бога́тии обнища́ша и взалка́ша, / взыска́ющии же Го́спода не лиша́тся вся́каго бла́га. / Прииди́те, ча́да, послу́шайте мене́, / стра́ху Госпо́дню научу́ вас. / Кто́ есть челове́к хотя́й живо́т, / любя́й дни ви́дети бла́ги? / Удержи́ язы́к твой от зла, / и устне́ твои́, е́же не глаго́лати льсти. / Уклони́ся от зла, и сотвори́ бла́го. / Взыщи́ ми́ра, и пожени́ и́. / О́чи Госпо́дни на пра́ведныя, / и у́ши Его́ в моли́тву их. / Лице́ же Госпо́дне на творя́щия зла́я, / е́же потреби́ти от земли́ па́мять их. / Воззва́ша пра́веднии, и Госпо́дь услы́ша их, / и от всех скорбе́й их изба́ви их. / Близ Госпо́дь сокруше́нных се́рдцем, / и смире́нныя ду́хом спасе́т. / Мно́ги ско́рби пра́ведным, / и от всех их изба́вит я́ Госпо́дь. / Храни́т Госпо́дь вся ко́сти их, / ни еди́на от них сокруши́тся. / Смерть гре́шников люта́, / и ненави́дящии пра́веднаго прегре́шат. / Изба́вит Госпо́дь ду́шы раб Свои́х, / и не прегреша́т вси, упова́ющии на Него́.

Священник же изшед, дает людем антидор. По скончании же псалма, и раздаянии антидора, глаголет: Благослове́ние Госпо́дне на ва́с, Того́ благода́тию и человеколю́бием всегда́, ны́не и при́сно и во ве́ки веко́в.

Лик: Ами́нь.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй, трижды. Благослови́.

Священник глаголет отпуст.

Аще убо есть неделя: Воскресы́й из ме́ртвых, Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, и свята́го (имярек, егоже есть храм и егоже есть день), и́же во святы́х отца́ на́шего Васи́лия Вели́каго, архиепи́скопа Кесари́и Каппадоки́йския, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко благ и человеколю́бец.

Многолетие.

Лик: Вели́каго господи́на и отца́ на́шего имярек, / Святе́йшаго Патриа́рха Моско́вскаго и всея́ Ру́си, / и господи́на на́шего преосвяще́ннейшаго имярек, / митрополи́та (или архиепи́скопа, или епи́скопа егоже есть область), / богохрани́мую страну́ на́шу Росси́йскую, / настоя́теля, бра́тию и прихо́жан свята́го хра́ма сего́, / и вся правосла́вныя христиа́ны, / Го́споди, сохрани́ их на мно́гая ле́та.

Таже глаголем Благодарственныя молитвы.

Конец Божественныя Литургии Великаго Василия.

В оглавление

Познавательные статьи:



Организация работы процедурного кабинета

Статус республик в составе РФ

Понятие финансов, их функции и особенности

Сущность демографической политии