Хва́лим, благослови́м, покланя́емся Го́сподеви, пою́ще и превознося́ще во вся ве́ки.

↑

▷ Содержание

⇐ ПредыдущаяСтр 2 из 2

Воскресе́ние Христо́во ви́девше, поклони́мся Святому Господу Иисусу, единому безгрешному. Кресту Твоему покланяемся, Христе, и святое Воскресение Твое пое́м и сла́вим. Ты бо еси Бог наш, ра́зве Тебе ино́го не зна́ем, Имя Твое имену́ем. Приидите, вси ве́рнии, поклони́мся святому Христову Воскресению; се бо прии́де Кресто́м радость всему миру; всегда́ благословя́ще Господа, пое́м Воскресение Его, распятие бо претерпе́в, смертию смерть разруши́.

Канон:

Читается канон Лазаря Четверодневного, в которых раскрывается смысл и красота празднуемых сегодня Церковью событий. Ниже ирмосы, предваряющие каждую песнь канона и катавасии, завершающие их:

Песнь 1: Пои́м Го́сподеви, / прове́дшему лю́ди Своя́ сквозе́ Чермно́е мо́ре, / я́ко еди́н сла́вно просла́вися.

Катавасия:Во́ду проше́д я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Песнь 3: Ты еси́ утвержде́ние / притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.

Катавасия:Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Седален, глас 4: Вку́пе предста́сте Христу́ Ла́зареве сестре́, / и слезя́ще го́рце, и пла́чуще его́, ре́ша Ему́: / Го́споди, у́мре Ла́зарь. / Он же я́ко Бог не неве́дый погреба́ния, / вопроша́ше я́ко Челове́к: / где положи́сте его́? / И приступи́в ко гро́бу, возглаша́ше четверодне́внаго Ла́заря. / Он же а́бие воста́, / и покланя́шеся Воскреси́вшему.

Песнь 4: Услы́шах, Го́споди, / смотре́ния Твоего́ та́инство, / разуме́х дела́ Твоя́, / и просла́вих Твое́ Божество́.

Катавасия:Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Песнь 5: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́нного, / но обрати́ мя / и к све́ту за́поведей Твои́х / пути́ моя́ напра́ви, молю́ся.

Катавасия:Вску́ю мя отри́нул еси́…

Песнь 6: Ио́ну в ки́те, Го́споди, / еди́наго всели́л еси́, / мене́ же, свя́заннаго мре́жами вра́жиями, / я́ко от тли о́наго, спаси́.

Катавасия:Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, / и услы́ши мя, / Бо́же спасе́ния моего́.

Конда́к прав. Лазаря, глас 2:Всех ра́дость Христо́с, / И́стина, Свет, Живо́т и ми́ра Воскресе́ние, / су́щим на земли́ яви́ся Свое́ю бла́гостию, / и бысть о́браз Воскресе́ния, / всем подая́ Боже́ственное оставле́ние.

Песнь 7: О́троцы евре́йстии в пещи́ / попра́ша пла́мень дерзнове́нно, / и на ро́су огнь преложи́ша, вопию́ще: / благослове́н еси́ Го́споди Бо́же во ве́ки.

Катавасия:От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́

Песнь 8: Мусики́йским орга́ном согласу́ющим, / и лю́дем безчи́сленным, покланя́ющимся о́бразу в Деи́ре, / три о́троцы не повину́вшеся, / Го́спода воспева́ху, / и славосло́вляху во вся ве́ки.

Катавасия:Царя́ Небе́снаго, / Его́же пою́т во́и Áнгельстии, / хвали́те и превозноси́те во вся ве́ки.

Песнь 9: Чи́стую сла́вно почти́м, лю́дие, Богоро́дицу, / огнь Божества́ прии́мшую во чре́ве неопа́льно, / пе́сньми велича́ем.

Катавасия:Вои́стинну Богоро́дицу, / Тя испове́дуем, / спасе́ннии Тобо́ю, Де́во Чи́стая, / с Безпло́тными ли́ки Тя велича́юще.

После канона:              СТИХИРЫ на хвалитех [прав. Лазаря, глас 1]:

Вся́кое дыха́ние да хва́лит Го́спода.

Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сотвори́ти в них суд напи́сан:/ сла́ва сия́ бу́дет всем преподо́бным Его́.

Воскресе́ние и жизнь челове́ком сый Христе́, / гро́бу Ла́зареву предста́л еси́, / уверя́я нам два существа́ Твоя́, Долготерпели́ве, / я́ко Бог и Челове́к / от Чи́стыя Де́вы прише́л еси́. / Я́коже бо Челове́к вопроша́л еси́: где погребе́ся? / И я́коже Бог воскреси́л еси́ / живоно́сным манове́нием четверодне́внаго.

Хвали́те Бо́га во святы́х Его́,/ хвали́те Его́ в утвержении силы Его.

Ла́заря уме́рша четверодне́внаго / воскреси́л еси́ из а́да, Христе́, пре́жде Твоея́ сме́рти, / потря́с сме́ртную держа́ву, / и еди́нем люби́мым, всех челове́к провозвеща́яй из тли свобожде́ние. / Те́мже покланя́ющеся Твое́й всеси́льней вла́сти вопие́м: / благослове́н еси́, Спа́се, поми́луй нас.

Хвали́те Его́ на си́лах Его́,/ хвали́те Его́ по мно́жеству вели́чествия Его́.

Ма́рфа и Мари́я Спа́су глаго́ласте: / а́ще бы зде был еси́ Го́споди, / не бы у́мерл Ла́зарь: / Христо́с же воскресе́ние усо́пших, / сего́ уже́ четверодне́внаго из ме́ртвых воскреси́. / Прииди́те вси ве́рнии, / Сему́ поклони́мся гряду́щему во сла́ве, / спасти́ ду́ши на́ша.

Хвали́те Его́ во гла́се тру́бнем,/ хвали́те Его́ во псалти́ри и гу́слех.

Божества́ Твоего́, Христе́, подава́я ученико́м Твои́м о́браз, / в наро́дех смиря́л еси́ Себе́, утаи́тися хотя́. / Те́мже апо́столом я́ко прове́дец Бог, / Ла́зареву смерть предре́кл еси́. / В Вифа́нии же прису́тствуяй лю́дем, / дру́га Твоего́ гро́ба не неве́дый, / уве́дети вопроша́л еси́ я́ко Челове́к. / Но Тобо́ю четверодне́вен воскресы́й, / Боже́ственную Твою́ держа́ву яви́, / всеси́льне Го́споди, сла́ва Тебе́.

Хвали́те Его́ в тимпане и лице, /хвалите Его во струнах и органе.

Четверодне́вна воздви́гл еси́ дру́га Твоего́, Христе́, / и Ма́рфино и Мари́ино рыда́ние утоли́л еси́, / показу́я всем, я́ко Ты еси́ вся соверша́яй Боже́ственною си́лою, / самовла́стным хоте́нием. / Ему́же херуви́ми вопию́т непреста́нно: / оса́нна в вы́шних, / благослове́н еси́ над все́ми, Бо́же, сла́ва Тебе́.

Хвали́те Его́ в кимвалех доброгласных, хвалите Его в кимвалех восклицания, /Всякое дыхание да хвалит Господа.

Ма́рфа Мари́и вопия́ше: / Учи́тель предстои́т, и глаша́ет тя, приступи́. / Она́ же ско́ро прише́дши, иде́же бе стоя́ Госпо́дь, / и ви́девши возопи́, па́дши поклони́ся, / пречи́стеи но́зе Твои́ облобыза́ющи, глаго́лаше: / Го́споди, а́ще бы еси́ зде был, / не бы у́бо у́мерл брат наш.

Глас 8: Воскресни́ Го́споди Бо́же мой, да вознесе́тся рука́ Твоя́,/ не забу́ди убо́гих Твои́х до конца́.

Ла́заря уме́рша в Вифа́нии, / воздви́гл еси́ четверодне́вна: / то́кмо бо преста́л еси́ гро́бу, / глас живо́т уме́ршему бысть, / и воздохну́в ад отреши́ стра́хом. / Ве́лие чу́до, многоми́лостиве / Го́споди, сла́ва Тебе́.

Испове́мся Тебе́ Го́споди всем се́рдцем мои́м,/ пове́м вся чудеса́ Твоя́.

Я́коже рекл еси́, Го́споди, Ма́рфе: / Аз есмь Воскресе́ние, / де́лом сло́во испо́лнил еси́, / из а́да воззва́в Ла́заря. / И мене́, Человеколю́бче, ме́ртва страстьми́, / я́ко сострада́телен воскреси́, молю́ся.

Сла́ва Отцу́ и Сы́ну и Свято́му Ду́ху.                 [прп. Лазаря,глас 2]:

Ве́лие и пресла́вное чу́до соверши́ся днесь, / я́ко мертвеца́ четверодне́внаго, / из гро́ба Христо́с возгласи́в воздви́же и дру́га призва́, / славосло́вим Его́, я́ко пресла́вна, / да моли́твами пра́веднаго Ла́заря / спасе́т ду́ши на́ша.

И ныне и присно и во веки веков. Аминь.                  [глас 2]:

Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся,/ кля́тва потреби́ся,/ Е́ва свободи́ся,/ сме́рть умертви́ся, и мы ожи́хом./ Тем воспева́юще вопие́м:/ благослове́н Христо́с Бог,// благоволи́вый та́ко, сла́ва Тебе́.

Великое славословие:

Слава Тебе, показавшему нам свет!

Слава в вышних Богу, и на земли мир, в человецех благоволение. Хвалим Тя, благословим Тя, кланяемтися, славословим Тя, благодарим Тя великия ради славы Твоея.

Господи, Царю Небесный, Боже, Отче Вседержителю, Господи Сыне Единородный, Иисусе Христе, и Святый Душе. Господи Боже, Агнче Божий, Сыне Отечь, вземляй грехи мира, помилуй нас.

Вземляй грехи мира, приими молитву нашу. Седяй одесную Отца, помилуй нас. Яко Ты еси Един Свят; Ты еси Един Господь, Иисус Христос, в славу Бога Отца, аминь.

На всяк день благословлю Тя и восхвалю имя Твое во веки, и в век века. Сподоби, Господи, в день сей без греха сохранитися нам!

Благословен еси, Господи Боже отец наших, и хвально и прославлено имя Твое во веки, аминь.

Буди, Господи, милость Твоя на нас, якоже уповахом на Тя.

Благословен еси, Господи, научи мя оправданием Твоим. (трижды)

Господи! прибежище был еси нам в род и род. Аз рех: Господи! помилуй мя, исцели душу мою, яко согреших Тебе.

Господи! к Тебе прибегох: научи мя творити волю Твою, яко Ты еси Бог мой, яко у Тебе источник живота, во свете Твоем узрим свет. Пробави милость Твою ведущим Тя!

Святый Боже, Святый Крепкий, Святый Безсмертный, помилуй нас! (трижды)

Слава, и ныне: Святый Безсмертный, помилуй нас.

Святый Боже, Святый Крепкий, Святый Безсмертный, помилуй нас!

Тропарь праведного Лазаря, глас 1:

Общее воскресе́ние / пре́жде  Твоея́ Стра́сти уверя́я, / из ме́ртвых воздви́гл еси́ Ла́заря, Христе́ Бо́же. / Те́мже и мы, я́ко о́троцы побе́ды зна́мения нося́ще, / Тебе́ победи́телю сме́рти вопие́м: / оса́нна в вы́шних, // благослове́н Гряды́й во Имя Госпо́дне.

Познавательные статьи:



Формы дистанционного обучения

Передача мяча двумя руками снизу

Значение правильной осанки для жизнедеятельности человека

Основные ошибки при выполнении передач мяча на месте