Святи́теля и чудотво́рца Митрофа́на, пе́рваго епи́скопа Воро́нежскаго

↑

▷ Содержание

Стр 1 из 10Следующая ⇒

Святи́теля и чудотво́рца Митрофа́на, пе́рваго епи́скопа Воро́нежскаго

На Ма́лой Вече́рни

На Го́споди, воззва́х: стихи́ры, глас 1:

Прииди́те, правосла́вныя Росси́йския Це́ркви ча́да,/ ублажи́м святи́теля Христо́ва Митрофа́на,/ и́же о ма́ле быв ве́рен,/ над мно́гими поста́влен есть от Небе́снаго Домовлады́ки,/ да мо́лится непреста́нно/ о ве́рою почита́ющих присносла́вную па́мять его́.

По достоя́нию о тебе́, святи́телю Христо́в, ра́дуемся,/ и моще́й твои́х нетле́нием хва́лимся:/ пролива́я бо от гро́ба твоего́/ целе́бныя струи́, я́ко во́ды,/ мир и благослове́ние притека́ющим к тебе́ подае́ши,/ я́ко предстоя́тель Го́рния Сла́вы,/ име́яй ве́лию благода́ть у Христа́ Бо́га на́шего.

На земли́ пожи́в а́нгельски,/ на Небеси́ жи́ти сподо́бился еси́/ и, свы́ше на оте́чество твое́ призира́я,/ низпосыла́еши благода́тныя да́ры/ ве́рою и любо́вию всесла́вную твою́ па́мять соверша́ющим,/ исцеля́я боле́зни душе́вныя и теле́сныя моли́твами твои́ми.

Сла́ва, глас 6:

Во всечестне́й па́мяти твое́й,/ пе́сньми и пе́ньми ликовству́юще,/ Боголе́пно сла́вим вся́ческих Го́спода Влады́ку,/ И́же за многопло́дное души́ твоея́ де́лание,/ многопло́дную благода́ть чудотворе́ний/ дарова́ тебе́, всеблаже́ные Митрофа́не, свы́ше:/ ты же моли́ изба́витися от бед душа́м на́шим.

И ны́не, пра́здника, глас 8.

Дави́д провозглаша́ше Тебе́, Пречи́стая,/ прови́дя освяще́ние вхо́да Твоего́, в храм,/ в не́мже концы́, днесь пра́зднующе,/ славосло́вят Тя, Всепе́тая:/ я́же бо пре́жде Рождества́ Де́ва/ и по Рождестве́ пребы́вши нетле́нна, Ма́ти Сло́ва Жи́зни./ Днесь в хра́ме Заха́рия весели́тся, восприе́м Тя, Влады́чице,/ и свята́я святы́х ра́дуются,/ подъе́мши Тя, исто́чника жи́зни на́шея./ Те́мже и мы псало́мски вопие́м Ти:/ о нас моли́ Сы́на Твоего́ и Бо́га на́шего/ дарова́ти нам ве́лию ми́лость.

На стихо́вне стихи́ры, глас 5:

Име́я свети́льник нога́ма твои́ма – зако́н Христо́в/ и во све́те Боже́ственных повеле́ний Его́/ непреткнове́нно ходя́ и поуча́яся,/ жили́ще Пресвяты́я Тро́ицы, прему́дре Митрофа́не, был еси́./ Отону́дуже и нам кре́пкий защи́тник/ от Бо́га показа́лся еси́,/ злы́я ду́хи си́лою Свята́го Ду́ха прогоня́яй.

Познавательные статьи:



Алгоритмические операторы Matlab

Конструирование и порядок расчёта дорожной одежды

Исследования учёных: почему помогают молитвы?

Почему терпят неудачу многие предприниматели?